جبتلكم موضوع دارتو وحدة متزوجة جديدة عندها 4 اشهر يعطيها صحة كتبت فيه نصائح عجبتني حبيت ننقلهالكم بلاك تفيدكم انتم حباباتي و بالاخص المقبلات على زواج و متزوجات حتا هوما نحتااااجكم كامل هنا فنفوناتي تفاعل تاعكم راه نااااقص ايا فرحوني باليكومنتاغ باش نزيد نحطلكم مواضيع جدد ايا نبداو الموضوع تاعنا مسوفجاتي ههههههه"
اولا:
اهم شئ هو ازالة الشعر من الجسم،ما يخفاش عليكم بلي احسن طريقة هي رجينة هي صح توجع بصح مرة الاولى برك و الثانية و من بعد تولي ما تحسيش لانو مع الوقت يبدا يخفاف الشعر بصح هاد طريقة ما تصلحش كي تتزوجي لانها تتطلب الشعر يكون شوية طويل باه يتنحى،نفس الشئ في ما يخص الة ازالة الشعر،مالا يتبقالنا طرقتين لي هي البودرة غالية او الكرام فيت هادوما ملاح خاصة غالية بصح في اليدين و رجلين اما المناطق الحساسة كيما الابطين و العانة ما ننصحكش بيهم لانهم مواد كيماوية و باه تعطيك نتيجة احسن ننصحك تعملي تقشير للجسم قبل ما تحطي البودة غالية و كي تحطيها و تنشف حكيها بالكاسة رايحة تلقاي رطوبة و ملمس ناعم و لا اروع
اما بالنسبة للمناطق الحساسة انا نستعمل الشفرة،ليش ليش الشفرة؟ هههه لانو هي اسهل طريقة بصح بشرط تستعملي الشفرة المناسبة و مرة واحدة في الاسبوع ما تضاليش غير تكرطي فيها ههههه اصلا الراجل و الله ما يتوله لهاد التفاصيل،المهم انا استعملت بزاف انواع بصح احسنهم هي شفرة جيلات الغوز انا شريتها 300 دج الباكي فيه 4 شفرات و الله شريتهم لعرسي و راني في 4 اشهر هادا وين خلاصولي،بصح قبل ما تنحي بيه لازم تحطي على المنطقة مرطب كيما انا نحط Johnson body lotion و هاد الشئ باه نمنع التهاب البشرة و باه ما تظهرليش حبوب من بعد،بعد ما تكملي الدوش ادهني المنطقة بنفس المرطب او بزيت الضرو هاد الزيت مليحة تمنع الالتهابات و ظهور الحبوب حطيها بعد ازالة الشعر في اي منطقة مهما كانت طريقة الازالة و كاين تاني زيت الورد المعروف بمزاياه في تبييض المناطق الحساسة امسحي بيه بواسطة قطنة بعد الدوش
ثانيا:
تعطير و ترطيب الجسم انا نستعمل creme enchanteur lavandee مليحة بزاف و تعطي احساس بالانتعاش و ترطب البشرة خاصة بعد ازالة الشعر و نستعمل تاني زيت جونسون و زايدة فيه شوية زيت الياسمين روووعة، و بالنسبة للرجلين نستعمل فازلين عطر ياسمين و انا زايدة فيها قطرات من زيت الياسمين ،بالنسبة للزيوت ننصحكم بشركة الكابتن هي احسن شركة في الزيوت هادو، اما اليدين و خاصة بعد الوضوء و غسل الاواني البشرة رايحة تتشقق مع البرد هادا مكاش كيما لوشن فازلين الوحد للون و كاين عدة أنواع منو و اخيرا احسن و اروع معطر الجسم هو جال مريم فيه عطر تاع بخور راح يخلي راجلك يهبل عليك شوية غالي 1700دج بصح يستاهل انا شريتو من الاغواط يتباع في صحراء بزاف عند لي يبيعو البخور و في المدن الاخرى الله اعلم
ثالثا:
ثالثا:
ازالة رائحة العرق، اهم شئ تاني خاصة للمتزوجات انا جربت كرام فالز هادي حطيها مرة واحدة في الاسبوع ما راحش تزيدي تسمعي بريحة العرق كامل لمدة اسبوع و حبذا لو تحطيها بعد الاستحمام مباشرة،نفس الشئ بالنسبة للشب المعطر انا زدت حكيت فيه شوية مسك ابيض و الله روعة بصح هادا ما عندوش مفعول طويل كيما الكرام هادا لازم تحطي منو كل يوم و ما ننصحكش تستعمليه بعد ازالة الشعر لانو رايح يغلق المسام و يعطي مفعول عكسي و طالك تاني ما تستعمليهش كامل في الابطين لانو يغلق المسام ايضا و طبعا استعملي مزيل عرق ديودورو من النوع لي بدون كحول لاااااازم لانو لي يحتوي على كحول هو لي رايح يديرلك ريحة عيانة كلي ما درتي والو انا استعملت dove, rexonna, narta,nivea كامل هادو ملاح
رابعا:
تسهيل العملية الجنسية، جربت انا زوج و خاصة في اول الزواج و لي عندها جفاف المهبل استعملي مرطب خاص لهاد الامور باه ما يصراولكش مشاكل صحية و انفيكسيو بصح ما ننصحكش تستعمليهم الا كنتي ناوية تحملي لانهم يضرو الحيوانات المنوية، انا استعملت durex play كاين فيه عدة انواع بصح شوية مكلف 800دج و تم تم تخلاص،انا عوضتو بزيت جونسون بصح ما ننصحكش لانو ماهوش معمول لهاد الاستعمال
خامسا:
ملح صبا، لتقشير الجسم كاين منو عدة أنواع و عطور بعد ما تشمخي جسمك ابليكيه و حكي بيديك و لا بالكاسة بالشوية و شللي رايحة تشوفي بشرتك ناعمة و حريرية
الترشوب زيت، انا خرج عليا كاين لي ما عجبهمش انا طولي شعري استعمليه بعد الدوش حطي منو شوي و خليه
ان شاء الله نكون فدتكم شوي و ما تنساوش تدعولي
#ريم
ليست هناك تعليقات:
إرسال تعليق