الرجل العصبي و المراة العنيدة
مرات نتسائلوا علاش لي كوبل يتعافروا ديما وبعض البنات دايرين الراجل كي الخاتم في صباعهم وااش في ميزكم بالعناد و العفار و الدواس باش يولي الراجل في يدك و طيحي في المسكين بالعياط و التعراش و تتستنايه يسمعلك
لوكان يبقى كل واحد على طبيعتو راجل بخشونته و الامراة بانوثتها ما يصرا حتى مشكل
حنا المخير فينا تلقايها تعرش لراجلها او حبيبها 5 مرات في اليوم هههه لالا يا حنونة الراجل العصبي ميتبدلش و قلال الفحلات اللي يقدرو لهذا النوع من الرجال
يا بنتي الراجل اسم على مسمى الرجولة , الخشونة , العصبية , فيه كل شيء يدل على الصلابة واش تديري نتيا بواحد انوش لي تقوليها يقولك ايه هههههه حتى في شكلو تلقايه نظيف عليك شعرة مكاين في جسمو ههههه يعيفني هذا النووع منحملوش ,,,,,,,, صدقوني مكانش كيما واحد غيوور و راسو خشين و واعر هههه ياا عمري نموووت عليه انا ... كيفاه حتى الرااجل العصبي الواعر ... يولي كي البيبي في يد مرتو او ( حبيبته ) ماشي بسك دايرتلو كادنة ههه لالا ( الله يسترنا ) لالا بسك هذيك فحلة تعرفلو الراجل كي يلقى اللي تحبو و ترفدلو هبالو و تسمعلو و تتقبل عيوبو محال يضرها و لا يطول في زعافو ثمثم يرضى على بالي دوكا شحال من وحدة راهي تقول درتلو اكثر من هاك و خدعني .. شوفي حنونتي انا في العنوان كتبت الراجل ماشي المرخس . الراجل العصبي في داخلو بيبي ناقص حنانة ... متقوليش انا طبعي هاك يا وراكي انثى يا انت اللي يقولو عليها الجنس اللطيف و الانثى من طبعها الرقة و الحنان و التفهم و اللسان الحلو و الرزانة ...
ما توليليش خالتي بوعلام دوك نصرعك واش ربحتي كي استرجلتي هو يقول كلمة انت ترجعي 10 يتقلق يكوبي عليك ... انت تقعدي تبكي و تندبي ... هو يخرج يقصر مع صحابو ينسى و يزهى شفتي ؟؟؟؟ غير انت الخاسرة هنا تعرفي الراجل علاش لازم الحنانة مع الراجل علاش الراجل يموت على المراة الحنينة لانو كي يعيط عليها و هي تسكت و مترجعش الهدرة طوال الزمان و لا قصار يولي يحاسب في روحو و يقول ظلمتها و يندم ( كاين اللي يستعرف و يطلب السماح و كاين اللي يندم غير مع روحو بلا ما يبينلك )
المراة الحنينة نقطة ضعف الرجل اما هذيك للي تضل تسترجل عليه تجيبها غير في عشها حتى و اذا كان هو الغالط و ظلمك يقول الشح هي اللي حبت تولي عليا فرعون خلي نبلوكيها و لا نديرها في الروجوتي و لا يهربلك من الدار هه ( بعيد الشر )
و لا هاذوك كي يداوسو طيحلو شغل راه يتعافر مع صاحبو ههه و انا علاش نقول الانوثة في الجزائر راهي في خطر يا بنتي احشمي شوية هو كي يقلقك و طيحيلو هو يضحك يقول حنونتي واعرة يجيبها بضحكة و تولو نورمال بصح نهار اللي يحكيلو صاحبو على حنونتو مرتو العاقلة الرزينة اللي مترفدش راسها قدامو هناا ميحسش بروحو راجل و تغيضو
علاااه خلقنا ربي بكيد عظيم ؟؟؟؟ الكيد مش انك ديري جريمة و تستعمليه غير في الحوايج اللي مش ملاح اشطاري و استعمليه في حاجة اجابية .. الكيد هو التسيتيت و المراة الكيدية هي اللي توصل للشية لراهي حاباتو بلاما تخرج للعيب و الوسيلة هي لسانها الحلو ... حنوني علاه درت هاك ... ياك علابالك منحبش .... حبوبي نغير علييك و نحبك تكون لياا وحدي افهم وحدة منحبها تخرب فيك متحكيش مع ذيك و لا ذيك .... الخ ههههه مع ترقاق الصوت يااا مامي السيد يموووت
كوووووني قااافزة كي يعيط اسكتي و اذا هدرتي قوليلو حبيبي كالم توا بشوية على روحك و علاه هذا العياط حبة حبة نحلو المشكل ..... الخ لوحيلو كلمة نحبك في وسط الهدرة عندهااا مفعول خااااص و لا قاطعيه و قوليلو نحبك هههه هنا يتكالما شوية شوفتو الحنانة واش تدير خليك رزييينة حتى في المشاكل عمرك مااتقدري تحلي المشكل بمشكل اخر مثلا نتما دوستو على سبة و انت تبداي ترفعي في صوتك و تزgي هناا تزيدي تكبريها 1 المشكل تاعكم و 2 اعياط تاعك فهمتيني ياا الكشرودة ؟؟؟
ماشي تحاربيه شغل راه مع هتلر و تحوسيه يكون حنين ... الراجل كي يقسح قلبو و يجرحك بالهدرة اعرفي بلي رجولتو لي نقصتي منها راهي تعاقب فيك .... الحاذقة هي هذيك المراة اللي تحسس الراجل برجولتو و قوتو قدامها .. ماشي اللي تقولو يا رخيس يا لي متسواش كي تتقلق يسامحك ايه ينسى لالا يبقى شااافي عليها طووول
تعرفيه يتقلق من حاجة متديريهاش متقوليش باش يغير . الراجل مايشوفهاش غيرة مثلا تروحي تهدري مع فلان باش تغيريه (هذ النقطة بالنسبة لي ماشي متزوجات ) هناا راكي غير تخلطي اسمحيلي فيها
كي يكون مقلق متكثريش الاسئلة و اذا هدرتي قولي كلام حلو مثلا توحشك زين نتاعي حاجة متستاهل تتقلق منها نروح نجيبك حاجة تاكلها و نخليك تريح خوذ راحتك كي تحب تحكيلي رااني ديما هنا .... حنوني اللي تقلقلك تقلقني انا ثااني متنساش انا و انت واحد اللي تضرك تضرني ..... الخ نعرفك ستوتة حبيبتشي
كي يكون يعيط عليك خليه و هبطي راسك كي يعيا من الهدرة و ينشف ريقو من التبراح حاولي تفهميه انت بطرقة انثوية تزعزع كياانو بصوت حنين و عقل رزين فهميه ....
كي تغيري من وحدة معنيلو ماشي تقوليلهالو ديراكت تجي صاامطة ,,, كي تعيطيلو في التلفون مرة , زوج, ثلاثة مرفدش خليه كي يكون ليبر راه يعاودك بلاك راه في الخدمة ,,, ماشي ملي تنوضي و انت تضغطي هذا msg هذا bipage .... الراجل مايحبش التزيار و ميحبش المراة اللي تلصق يحب هذيك اللي عندها كرامة هذيك اللي تخليه يتوحشها ماشي اللي تحرقلو التلفون ب les appelles يااو على بالي تحبيه و توحشتييه ايه قع نحبو و نتوحشو مي قيمي روجك يا لالة ثما باش يقيمك الراجل بلا مزيتو ...ماشي كل ما يضرب عليك يلقاك وااجدة تعززي شوية
ليست هناك تعليقات:
إرسال تعليق