كامل نحتاجو العجينة المورقة و قليل لي يخدمها و تنجحلو اليوم جبتلكم وصفة ناجحة ١٠٠/١٠٠
شوفو معايا
الوصفة كنت نخدم قبل ب 750 غ فرينة وليت الآن نخدم بكيلو فرينة وتخرجلي نفس الشيء
نحط في قصعة كيلو فرينة وملعقة كبيرة سكر ونصف ملعقة كبيرة ملح و 3 ملاعق كبار خل ابيض أو عصير نص ليمونة
نزيد نصف كأس متوسط زيت ونعجنها بالماء في الصيف ماء بارد وفي الشتاء ماء الحنفية
نلم العجين عادي ما طرية مايابسة وندخلها داخل كيس بلاستيكي ونحطها في الثلاجة ترتاح
نجي لزبدة التوريق نحتاج 500 غ
نعجنها بين ايديا حتى تصبح بيضاء نشكلها كرة
وندخلها داخل كيس ونشكلها على شكل مربع أو مستطيل مثل الصورة
ندخلها الثلاجة ترتاح وتعاود تبرد لمدة 15 دقيقة
فوق طاولة العمل نحل العجين باستعمال الفرينة على شكل مربع كبير ونحط في الوسط مربع الزبدة لكن عكس مربع العجين مثل الصورة
نغلق الجوانب العجين على الزبدة
نقلب العجين ونبدأ نحل بالحلال بالطول ثم نطوي على 3 مثل محفظة النقود مثل الصورة
ثم ندور العجين نصف دائرة يعني الجهتين المفتوحتين هوما لي يقابلوني كي نكون نحل العجين (شوفي السهم )
ونعاود نفتح العجين بالطول ونزيد نطوي على 3 وهنا نكونو عملنا دورتين للعجين نغلفها بكييس نيلون وندخلها الثلاجة ترتاح ربع ساعة
ثم نعاود نفس الشيء نعمل دورتين مثل الأول ونزيد نغلفها ترتاح 15 دقيقة ثم نزيدلها دورتين اخيرتين وهنا نكونو عملنا 6 دورات عادية للعجين ونتحصلو على اروع عجين مورق مثل المحلات وأحسن
نقطعو حسب الحاجة و نغلقو ونديرو في المجمد إلى وقت الاستعمال
ملاحظة : نعاود نفهم مليح
عدد الدورات الكلية 6 دورات
ونخدم ب 2 دورات ونخليها تريح 15 دقيقة
اذا استعملتيها للحلويات فقط ممكن تعطيرها ب ملعقة أكل فانيليا بودرة في العجين
جربوها لبنات ساهلة ماهلة ماتعطلش والنتيجة رااائعة جدا
دعواتكم ماتنساونيش
ليست هناك تعليقات:
إرسال تعليق