توبة فتاة الليل (الجزء الرابع )
الحلقه 34
في صالة كبيرة تحفونة الغنا و الزغاريت الماكلة من كل نوع الحلو و المالح و الحامض و الشراب شمبانيا و غيرها كثير(خخخخخخ مانعرفش اسماء اخرى للشراب غير البيرة و الشمبانيا هههههه)..ناس بزاف شخصيات معروفة فالبلاد سياسيين و رجال اعمال..رجال حطة تشوف هذا ينسيك فلي قبلو..نساء تلمع بالذهب و المجوهرات و لبسة مبهرجة...تشوفهم تلقا نظرة تحدي بين عينيهم كل وحدة تقول انا المخيرة هنا..كل وحدة مغرورة بزينها...على الطاولة حسام و لينا قاعدين مقابلين القاضي وقعو على العقود...منى و واحد من رجال حسام شهود على هذا الزواج...الناس الكل تصفق على العرايس...حسام فرحتو اليوم مايعطيها لحد...
لينا:حسام وين المخذرات لي قلتلي عليهم
حسام:هههههه افرح الليلة ليلتك يا عروسة ماتهتم بحتى حاجة خلاف..
لينا:حسام اذا مانسيتش ممكن يقتلوني اذا ماوصلتش المخذرات...واش من ليلة تحكي عليها
حسام:شكون يتجرأ يمس شعرة من راسك و انت مرتي
لينا:حسام طمني و قولي وقتاش تلحق
حسام:اطمن حبيبي...تلحق على 10 تاع الليل......و هي تحكي معاه لمحت راجل و مرا جايين جيهتهم..ملامحهم مش غريبة عليها صحيح الزمن بدلهم شوية بصح نفس المشية و نفس عزة النفس الراجل لابس كوستيم كحل و المرا لابسة سواري دوري تفتق...قلبها خبط عقلها تشلوش عينيها تشرعو لحمها ترجف...صوت خطواتهم يزيد من رجفتها لحقو عندهم...سلمو على حسام
حسام:لينا هذا سي كمال رجل اعمال كبير و هاذي مرتو....ايييييه عرفتهم من اول لمحة لمحتهم كيفاش تنساهم و هوما سباب العذاب لي عاشتو..صوتو رجعها لعشرين سنة لور...وقت لي كانت تسمعو و تتكمش في بعضها وقت لي كانت تحط يديها على وذنيها باش ماتسمعش صوتو و هو يسب فيها...
كمال:هههههه و درتها يا حسام و جبت الثانية...انا مع وحدة و مافريتهاش هههههه
حسام:هههههه هذا القلب و ما يهوا يا سي كمال..
كمال:واشبيها عروستك تبان مش قد بعضها...غير الخير
خديجة:ايه وحدة تتزوج مع واحد متزوج من قبل اكيد تكون متوترة...ولا راني غالطة مدام..
حسام:هههه لالا راهي مقلقة من حاجة خلاف...اتفضلو سي كمال استمتعو بوقتكم.......حكم لينا من يدها و كركرها معاه بعدها شوية..مافهمش واش صرالها و علاش تقلقت هكذا وجها شاحب و لونها صفر..
حسام:لينا غير الخير...كنت لاباس عليك
لينا كانت تحوس على صوتها لي ضيعتو من خوفها ماقدرتش تهدر ولا تجاوب حسام......سهرية كاملة و هي على اعصابها متمنية النهار هذا يخلص على خير و ترجع لإنتقامها...و خططها لي وجدتهم لكمال و خديجة...خلص الحفل و الناس روحو و مابقاو غير العرسان....حسام كان متلهم باش يدي غرضو منها و هي تستنا على نار البوليس يلقيو القبض عليه بتهمة تجارة المخذرات....هوما خارجين و تليفونو صونا
حسام:الو....كيفاش.....استناوني ضرك نجي ماتمسو حتى حاجة....هبل و تغشش بدا يعيط و يخبط...عندو مدة و هو يستنا فالنهار هذا مالازمش يصراو فيه مشاكل...
لينا:واش كاين حسام..وين رايح؟؟
حسام:صرا مشكل و لازم نروح....هيا معايا
لينا:وين نروح معاك نستناك هنا..
حسام:مستحيل نخليك هنا اطلع للطونوبيل ماتهبلنيش كثر من هكذا...اطلع.........هذا لي ماكانتش حاسبتلو حساب هكذا خطتها تفشل و قادر يقتلها..بعد ما حاولت معاه بكل الطرق باش يخبرها وين تلحق المخذرات و ماقدرتش تعرف..خبرت الراجل لي رشاتو من رجالو وقت لي توصل المخذرات يعيط لحسام و يقولو صراو مشاكل و هكذا حسام يروح و البوليس يقدرو يتبعوه و يحكموه بالجرم المشهود...و هي تختفي على الانضار بصح تأتي الرياح بما لا تشتهي السفن...هاو مديها معاه و مش ضامنة واش يصرالها ممكن يفيق بيها تخدع فيه يغتصبها ولا يقتلها..افكار بزاف دارو في راسها ماكنتش تتوقع تكمل هكذا.....ركبت معاه و الطريق طول و هي تخمم كيفاش تخرج من الورطة هاذي...بصح وقت لي تتفكر بلي عُدي و رجالو يجيو و يحكموه ترتاح و تقول فيها خير ....وصلو لفيلا كبيرة دخل رجليه فوق راسو لقا رجالو دايرين كلهم مسلحين
حسام:واش كاين واش صرا؟؟
واحد:سي حسام لقينا جاسوس بيناتنا و خبر البوليس على المخذرات
حسام:وين راه؟؟اااااه اليوم نشرب من دمو....و البوليس عرفو وين تلحق المخذرات؟؟؟
واحد:لالا ماكنش يعرف وين تلحق و حكمناه قبل مايقولهم حاجات بزاف
حسام:اتهناو مالا البوليس مستحيل يوصلو هنا...اقتلوه و رميوه فالبحر
الحلقه 35
دخلها لبيت فالفيلا و بدا يقرب ليها و هي تبعد و تحاول تلقا حل يخلصها منو..
لينا:انا تعبت اليوم ندخل ندوش و نخرج
حسام:اوكي حبي تخرج تلقاني نستنا فيك...(ههههه ايه على راحتك يا لينا الليلة ليلتك ضرك ولا من بعد الدوش).....دخلت للدوش فتحت العين و قعدت تستنا وقتاش يلحقو البوليس...طولت و هي قاعدة حتى ولا حسام يدقدق عليها فالباب
حسام:لينا..لينا نازلت مطولة؟؟
لينا:(الله يلعنك يا حسام و يلعن النهار لي شفتك فيه)...لالا حسام ضرك نخرج شوية برك....زادت شوية و خرجت لقاتو موجد طابلة مزينة بالورد و الشموع و دبلة حمرة الله الله...كيكة عل شكل قلب و مكسرات و شمبانيا...شافها تبسم و هو يصب الشراب فالكيسان...هزهم مدلها واحد و حكم واحد...و قرب ليها
حسام:ههههه شكون قال لينا تتزوج بحسام لي كانت ترفض حتى تخزر فيه
لينا:هذا القدر...ولا انت ماتأمنش بالمكتوب(تحكي معاه و متقززة من نفسها...وقتاش يلحق البوليس و يهزوه عليها تتهنا منو)
حسام:المكتوب..!!!ههههههه ايه عندك حق المكتوب....بصحتك
رافدة كاس الشراب و تخزر فيه بلعت ريقها بالسيف..رشفت منو رشفة وحدة طعمتو غريبة مش متعودة عليها اول مرة تذوق الشراب....هههههه حتى فالبار كاسها ديما كوكتال مش شراب...تحتاج تكون صاحية و فاطنة لكل صغيرة و كبيرة مش دايخة و سكرانة....قلبها جا من الطعم الغريب للشراب...كملت الكاس و بدات تترنح و دوخ سكرت بصح علابالها بلي مالازمش تسمح لحسام ياخذ غرضو منها....هو يقرب و هي تبعد حتى طيحها على السرير حاولت تبعدو عليها دزتو طبعتو بصح فات الفوت غريزتو الحيوانية استفاقت و لحق الوقت لي صبر عليه بزاف.....كانت لابسة كاب بدا يقطعلها في حوايجها...مالقات بيها وين كانت مخمورة للخر ماقدرتش تتحرك غير دموعها علة خدها تسيل.....في لحظة تفتحت الباب.
الحلقه 36
عُدي راح لدار لينا مدتلو نجية الامانة لي خلاتهالو لقاها تسجيلات صوتية لحسام و معاها جهاز gps ....وجهو متبدل ندم ندامة كبيرة لي خلاها جزء من اللعبة هاذي...يحبها و مايقدرش يخليها تكون مرت واحد أخر..راضي بيها حتى اذا كانت بنت ليل و عدا عليها الف واحد...يعمل جهدو باش يردها للطريق الصحيح و يخليها تكون توبة بالقول و الفعل...مايسمحش فيها مهما كان....نجية كي شافتو وجهو مبدل خافت و تحيرت على لينا..
نجية:واش كاين يا وليدي...لينا بخير ياك ماصرالها والو...
عُدي:اتهنا عليها نجية....مستحيل نخلي حاجة تصرالها
نجية:اااااه على بنيتي حياتها كامل و هي تتعذب
عُدي:شحال و انت تعرف لينا؟؟؟
نجية:من وقت لي كان عمرها 17 سنة...يا وليدي رد بالك عليها و احميها و الله ماتستاهل لي صرا فيها..
عُدي:اتهنا عليها....بصح قولي واش تعرف على ماضيها..
نجية:اسمحلي يا وليدي مانقدرش نحكيلك...مانقدرش
عُدي:على راحتك نجية.......خرج من دارها عيطلها فالتليفون غالقتو...تنرفز و صعر و ماعادش يعرف الطريق...رجع لمركز البوليس لقا جواد مدلو التسجيلات و قالو يجمع الرجال لازم يكونو مستعدين باش يداهمو البلاصة لي تلحق ليها المخذرات...بدل حوايجو لبس الكومبا حط الكاسكيتا و جواد يخزر فيه لقاه مقلق و منرفز..
جواد:عُدي واش كاين غير الخير...كلش مليح؟؟؟
عُدي:لينا رايحة تتزوج من حسام...لازم نروح نحبسهم.
جواد:علاش خليها دير واش تحب..بلاك هي ماعندهاش اعتراض
عُدي:لا مستحيل نخليها تتزوج بيه...مستحيل(بدا يعيط عليه وجهو مزير حواجبو معقودين...وجهو مايتفسرش)
جواد:علاش مستحيل....حبيتها يا عُدي؟؟حبيت بنت الليل؟؟
عُدي:ايه حبيتها...ايه...ايه عُدي حب بنت الليل و مانقدرش نشوفها تتزوج من واحد تكرهو غير باش تخليني نلحق للحاجة لي حابها انا....قلبي ماطاوعنيش يا جواد
جواد:ماتقدرش تروح و تفسد عرسها و تخربلها خدمة عندها مدة و هي تتعب على جالها...هي خدمت الخدمة لي طلبتها منها ماتجيش انت في دقيقة تفسدها...هذا قضاء الله.....هوما يحكيو و تليفون عُدي صونا هزو لقاه نومرو جديد رفد عليه
عُدي:الو شكون معايا
منى:عُدي ضابط البوليس؟؟
عُدي:ايه انا هو شكون انت؟؟
منى:انا منى صاحبة لينا....سمع اسمها قلبو هرب عليه وقف مخلوع
عُدي:لينا مليحة...علاش تليفونها مغلوق....علاش خليتها تتزوج بحسام
منى:اسمعني مليح..زواجها منو مفبرك ماهوش حقيقي القاضي لي عقدلهم ماهوش قاضي هو ممثل حنا جبناه و عقد الزواج مزيف
عُدي:.....
منى:وقت لي تلحق فيه المخذرات حسام يكون معاهم تقدرو تلقيو عليه القبض و لينا ترجع لحياتها القديمة انت تنسا انك عرفتها و هي تنسا انها عاونتك...و ماتقولهاش بلي عيطتلك و خبرتك
عُدي:استنا منى....الو...الو........الوووووو....اااااااااه الله يلعنك يا حسام
جواد:واش قالتلك؟؟
عُدي:زواج لينا و حسام مفبرك و ماهوش حقيقي
جواد:كنت متأكد...لينا مش جايحة باش تتزوج واحد كيما هذاك........فات الوقت رزين عليهم...9:55 دقيقة قاعدين عل اعصابهم متوترين و مقلقين.....خرجو رجال البوليس ركبو فالطونوبيلات و ديماراو....جهاز GPS حددلهم بلاصة حسام....فالطريق صونا تليفون عُدي لقاها منى
منى:عُدي الحق....حسام دا لينا معاه و ماعلاباليش واش قادر يديرلها....الحقها يا عُدي.......عُدي جمد و احاسيسو تشلت تفكر كلامها و كرهها لحسام و تخيل الموقف لي حطها فيه و واش قادر يصرالها معاه.....هبل و طلعلو الغاز...زاد فالفيتاس جواد قدامو غير يشهد و يستغفر هههه....لحقو للفيلا و بدا صوت الرصاص بين البوليس و رجال حسام...خلات موتى و جرحى..لقاو القبض على رجال حسام لي قعدو عايشين و لقاو المخذرات بصح حسام و لينا لا خبر عليهم.....حوس عليها كي المهبول قلب الفيلا و مالقاهاش خاف لونو تبدل الدموع شدهم في شفار عينيه...قلبو يرجف و ماقايلو خير....جواد يهدي فيه و هو مش مستعرف...
جواد:عُدي استهدا بالله ضرك نحوسو عليها و نلقاوها
عُدي:ااااه يا ربي وين نلقاها وين...جواد قولي واش ندير...
جواد:خوفك عليها هبلك و نساك فالGPS شوف ليه وين تلقا حسام تلقاها...شوف اكيد نلقاوهم....جبد GPS بدا يتبع فيه وين يديه...راح يجري لحق قدام البيت فتح الباب و دخل....شافها رجعت فيه الروح...حكم حسام بعدو عليها نحا الفاست حطها عليها غطاها و صرات باڨار بيناتهم..عطاه طريحة عمرو كسرلو يدو و زوج من الشطب فسدلو خليقتو..فرغ فيه الغش و الخوف لي حس بيهم...حكمو من رقبتو خنقو لحق بيه جواد على الانفاس لخرة بعدو عليه
جواد:عُدي اطلقو حاب تقتلو...اطلقو
عُدي:حيوان..رخيس..كون تصرالها حاجة نقتلك يا حسام و الله ماندي الروح تاعك و ماتسميني عُدي.....جواد خرج حسام و هو راح يجري عندها...كانت مرمية فوق السرير لا تتحرك ولا تتكلم غير دموعها على خدها نازلين....سترها و هزها بين يديه..الشراب مأثر عليها ركبها فطونوبيلتو و قال لجواد يتكفل بكلش حتى يوصل لينا لدارها و يرجع..
الحلقه 37
عُدي:جواد ادي الكلاب هاذو للمركز و انا نوصل لينا لدارها و نرجع
جواد:راهي سكرانة اديها لدارك و تهلا فيها و غدوة يديرلها ربي حل...
عُدي:اوكي صاحبي....طلع للطونوبيل خزر فيها قطعتلو قلبو لي صرالها اليوم كامل بسبابو...مسحلها دموعها من خدها حطلها السبتة و ديمارا...الطريق طول و هي تهترف مرة تضحك و مرة تبكي...لحق لدارو نزل جا يهزها ماخلاتوش...هبطت تترنح مرة تترما عليه مرة تبعد عليه مرة تعنقو مرة تضربو على صدرو....و هو متحملها
لينا:ههههه هذا انت يا ضابط عُدي..(تخزر فيه بعينين ذابلين)علاش طولت باش جيت...هههههه قريب وليت مرت حسام بالحق مش تمسخير....امم هههه يا ضابط علاش انا...ديما تجرحني بكلامك...بواش غلطت معاك...اه جوابني يا ضابط...
عُدي:لينا...ادخل للدار غدوة نحكيو راك سكرانة....حكمها من يدها نحاتلو يدو
لينا:لا مانيش سكرانة...هههه عُدي انا بنت ليل و تعدا عليا الف واحد..نخدم بالساعة ولا بالليلة...كل كلمة قلتها قسمتلي قلبي يا ضابط وجعتني هناعلاش يا ضابط علاش كلامك عذبني و جرحني.
عُدي ماتحملش يتفكر الكلام لي قالهولها و خلاها تتعذب..هزها بين يديه و هي تفرفط كي الطفل الصغير...دخلها للدار
لينا:اطلقني مانيش سكرانة...اطلقني نعرف نمشي وحدي.....بدات ترخف روحها بين يديه حطت راسها على صدرو و غمضت عينيها....همستلو.._بنت الليل تح...تحب الضابط...توبة تحب عُدي.....ماعرفش اذا سمعها مليح ولا من حبو ليها و لهفتو عليها تخيلها تحبو حتى هي....نفسيتو ارتاحت و حس روحو طاير فوق الغيم..قلبو رجعت فيه الحياة..وجهو تبسم...فرح و الدنيا ماوسعت فرحتو...دخلها للبيت حطها فوق السرير غطاها و قعد قدامها....ملامحها البريئة مخبية ورا شعرها لكحل الحريري لي طايح على وجها..بيدو بعدلها شعرها و بشفايفو سرق بوسة لي كان من المفروض تكون على خدها بصح هي دورت وجها و شفايفها جاو على شفايفو...جمد في بلاصتو ماقدرش يتحرك...الشفايف لي من زمان و هو يتشها فيهم اليوم و من غير قصد ذاقهم....تريسيتي ضرب فيه لحمو تكهربت ضربات قلبو زادت..بدنو فشل...احاسيسو تخذرت و النفس تقطع عليه السخانة طلعتلو...جبد روحو عليها قبل ما يدير حاجة غالطة و يندم عليها...قعد على الكرسي مقابلها...يخزر فيها و يملي في عينيه منها حتى غلبو النعاس و رقد..
ناضت الصباح راسها يوجع فيها مدڨدڨة تقول بايتة تحارب..فتحت عينيها بالسيف خزرت خزرت البلاصة هاذي غريبة عليها و حوايجها نصهم مقطع...تخلعت و بدات تعيط..فطن مفجوع من عياطها
لينا:اااااااااااااااااااع....حكمها جبدها ليه غطالها فمها بيدو...._اسكت يا مصيبة الناس تنوض تقول صباح الخير و انت تعيط و تصيح على صباح ربي.....نحاتلو يدو و قالتلو:واش صرا...وين راني...حوايجي...عُدي واش صرا
عُدي:راك في داري و على سريري و حوايجك مقطعين....في رايك واش صرا
لينا:....لالالالالا مستحيل...مستحيل لالاااااااا..لا..لالا..لا
عُدي:اااااااااي وذنيا اسكت...اسكت غير نتمسخر ماصرا والو..و الله ماصرا شي
لينا:علاش راسي يوجع و ماتفكرت والو....ليلة البارح...اااااا حسام حكمتوه
عُدي:اتهنا حسام حكمناه و راه فالحبس...و يا لالة راسك وجعك من الشراب...البارح كنتي سكرانة و على هاذي ماتفكرتي والو..زودتها فالشراب مع حسام البارح؟؟؟
لينا:لا كاس واحد
عُدي:ههههههههه كاس يدير فيك هكذا؟؟؟هاك موالفة بالشراب...البس هاذ لحوايج خير من كي تبقا هكذا....مدلها سروال و شوميز تاعو و راح...ناضت غسلت وجها لمت شعرها و لبست حوايجو خرجت من البيت حوست دارو كاملة...دار شابة مؤثثة من كلش فيها كوزينة و صالون و زوج بيوت...
عُدي:واش دير هنا؟؟
لينا:...اووووووه خلعتني
عُدي:هههه...احكم اشرب القهوة باش تفطن و وجيعة راسك تخف عليك....مدلها القهوة و قعد قعدت مقابلتو راسها في لرض
لينا:اول مرة نشرب
عُدي:كيفاش؟؟؟
لينا:البارح اول مرة نشرب فيها و على هاذي سكرت و ماعرفتش واش صرا
عُدي:اول مرة تشرب فيها..!!!هههههه و لي كنت تشربو فالبار ان شاء الله ماء
لينا:لا كوكتال مش ماء
عُدي:ضرك انت تحكي صح؟؟؟واش خلاك تدخل للبار و تشرب كوكتال
لينا:هاذي امور شخصية انت مادخلك فيها....كملت لي طلبتو مني و ضرك انت في طريقك و انا في طريقي...عيش حياتك كأنك ماعرفتنيش و انا كيف كيف...من اليوم لا عُدي يعرف لينا و لا لينا تعرف عُدي...متفاهمين؟؟؟
عُدي بعد ماسمع كلمة نحبك و ذاق الشفايف لي تمنا يذوقهم و حس بالدفا و الحنية معاها..عاش لحظات من الفرحة و السعادة طار فيهم لسابع سما...جاية و بكل بساطة تقولو لا انت تعرفني ولا انا نعرفك...بكل بساطة قطعت جناحاتو لي طار بيهم و رجعتو دفنتو في سابع ارض...دفنتو و دفنت المشاعر لي بيناتهم...وقت الانسان يكون سكران يقول الحقيقة بدون ارادة يعني هي تحبو و تعشق فيه بصح ماحبتش تقولو..كونها بنت ليل هو لي خلاها ماتعترفلوش بحبها و مشاعرها جيهتو....أسئلة بزاف دارت في راسو و مالقالهاش حل
الحلقه 38
......بعد عشرة ايام.......
كان صباح مغيم و حزين...السما تمطر مطر خفيف و رقيق...ناضت كي عادتها دوشت فتحت الخزانة باش تلبس حوايجها شافت سروال و شوميز عُدي لي لبستهم نهار كانت في دارو...هزتهم ضمتهم لصدرها تشم في ريحتو لي بقات في عقلها و خذرتلها احاسيسها...من هذاك النهار ماشافتوش حتى وقت لي تروح لدار ميادة تخدم فيها ماعادش يجي...ههه خلاص كملت خدمتها ماعادش يهتم لبنت الليل.....اليوم النهار لي تسلم فيه الدار لميادة كملت خدمتها فيها...الدار لي عاشت فيها نهار كامل معاه تحملت فيه هبالو و زكارتو و نفذت كل اوامرو...ذكريات بقاتلها كل ماتتفكرهم تتبسم و تتمنا يرجع هذاك الوقت و يحبس الزمن عليهم.....رجعت الحوايج للخزانة و تنهدت..لبست و مكيجت خلات شعرها مطلوق و خرجت لقات لمياء و نجية فالكوزينة و منى مازالت راقدة....نجية و لمياء ولاو صحبة نهار كامل يحكيو و يضحكو...
لينا:صباح الخير..
نجية:صباح النور...اقعد نحطلك تفطر
لينا:لا خالتي نجية عندي شغل لازم نروح
لمياء:اتهلا في روحك يا بنتي
لينا:امم...و اه كي تنوض منى قلها تروح للمكتب نعرفها صامطة.....خرجت ركبت طونوبيلها و راحت لدار ميادة لمت دوازن الخدمة و عيطتلها باش تجي تشوف دارها.
عشر ايام و هو مش على بعضو من الخدمة للدار التبسيمة هربت من وجهو ماعادش عُدي لي الناس الكل تعرفو....ناض الصباح كي العادة لبس و خرج كلمة ماهدرهاش ميادة و فاطمة لاحظو بلي ماراهش مليح تبدل و تبدل بزاف....راح للخدمة دخل للبيرو و قعد...دخل جواد ماداهاش فيه قعد مقابلو ماحكا معاه ماخزر فيه..
جواد:لوقتاش ناوي تقعد هكذا؟؟مهمل روحك و مهمل خدمتك؟؟
عُدي:...ماقدرتش يا جواد ماقدرتش
جواد:تحبها علاش خليتها تروح؟؟؟علاش ماحبستهاش و قلتلها بلي تحبها مهما كان لي في حياتها.....عُدي تحبها حارب على جالها ماتخليش حبك يضيع من يدك...لينا ولا توبة مايهمش لي يهمك انو حياتك بلا بيها ماتسواش و انت بلا بيها ماكش عُدي
عُدي:هي لي حبت تبعد مانقدرش نحتم روحي عليها...
جواد:اووووه...هي حبت تبعد و انت الصق فيها ماتخليهاش تبعد...افطن على حالتك كيفاش رجعت حتى يماك و ماعادتش تعرفك نهار كامل مقلقة عليك..دير حل لحياتك قبل مايضيع منك كلش.......صونا تليفون عُدي لقاها ميادة هز عليها...
عُدي:ها ميادة واش تحتاج
ميادة:لينا كملت الخدمة فالدار...تروح معايا نشوفوها؟؟
عُدي:اففففف روح مع راجلك
ميادة:عندو محاكمة اليوم...ومانيش حابة نروح وحدي
عُدي:ميادة الله يرضا عليك مانيش قاعدلك منين تقولي تلقاني...عندي خدمة اذا ماكنتش علابالك..
ميادة:بسم الله عليك...علاش شاعل هكذا...خلاص ضرك نروح وحدي
عُدي: وجد روحك ضرك نفوت نديك.....كوبا عليها و دور لجواد لي كان قاعد مقابلو..
عُدي:مازاد بانلك والو في حكاية لينا
جواد:لا ماعرفنا والو..
عُدي:اوكي تقدر تحبس البحث عليها ماعادش يعنيني امرها......ناض خرج رجع للدار بدل حوايجو و دا ميادة لدارها باش تشوفها...الطريق كامل و هو يخمم في كلام جواد..صحيح يحبها بصح ماعترفلهاش بمشاعرو ماحاولش يقابلها و يقولها بلي يحبها و يعشقها لحد الجنون.....لحقو للدار نزلو دخلو...و هنا كانتلهم المفاجأة وااااااااو ميادة ماصدقتش اذا صح هاذي دارها...خست روحها في جنة المولوار حيطانو ورد احمر من كل نوع...اما بيت الضياف كأنك قاعد في خيمة فالصحرا رمل و نخيل و شمس تحرق فراش و ديكور ترڨي....بيت لولاد حلبة سباق كبيرة جمهور و اضواء و سيارات..فيها سرير صغير على شكل سيارة سباق الرالي.....لا ميادة و لا عُدي توقعو الدار ترجع بالهيئة هاذي متفاجئين..ميادة فرحتها كبيرة ماكانتش تستنا منهم الخدمة هاذي...لحقو لبيت النوم لقات لينا خرجت منها..
ميادة: وااااااااو لينا يعطيك الصحة فاحلامي و ماكنتش نتصور داري ترجع هكذا
لينا:هههه ان شاء الله تعجبك البيت لي قعدت.....دخلو للبيت بركة كبيرة و طيور الاوز فيها و على شطها عروسة بروبتها البيضة و عريسها واقف و محضنها ملور صورة تفتق تهبل ميادة طار عقلها معاها.....خزرت فيه و عينيها جاو بالدموع..ترمات في حضنو عنقتو و عنقها زير عليها في صدرو دموعها على خدها...مسحلها دموعها و قالها:اشششششت ماتبكيش
لينا:توحشتك بزااااااف...نحبك عُدي نحبك
عُدي بصوت حنين و رقيق:و انا نحبك لينا و حياتي بلا بيك ماتسوا والو.....هزلها راسها وجهو مقابل وجها انفاسهم تخلطت دقات قلبهم اندمجت...حط شفايفو على شفايفها و ذابو في بوسة العمر......
ميادة:عُدي...عُدي وين شارد؟؟
عُدي فطن من تخيلاتو لي كان يتخيل فيها..هي حتى ماداتهاش فيه و ماقيمتوش كأنها ماتعرفوش خلاص...._لا راني هنا مانيش شارد.....قعد يخزر فيها و هي تحكي مع ميادة و تضحك...اييييه انا قلبي يتقطع و هي تضحك..حبها ليا كذب في كذب...نستاهل انا لي حبيتها واش كنت مستني من بنت ليل...اااااه يا قلبي انساها.....
لينا:ميادة قبل ما نروح عندي ليك كادو و ان شاء الله يعجبك.....مدتلها كادو كبير مغلف فتحتو ميادة لقاتو صورة للمحامي #محمد_حاتم....._وااااو صورة لمحمد حاتم و عايلتو...منين جبتها لينا؟؟؟
لينا:اعتبرها كادو عرسك....هاذي نسخة من الصورة الوحيدة لي بقات لمحمد حاتم و مرتو مريم علي و بنتهم #توبة.......سمع كلامها و عينيه وساعو....ماصدقش وذنيه..توبة بنت مريم علي و محمد حاتم؟؟؟؟
الحلقه 39
رجعت لمكتب الديكور دخلت لقات سورية برك مالقاتش منى....دخلت للبيرو تاعها و قعدت شوية هكذا دقدقت الباب و دخلت سورية...
سورية:لينا لحقتك برية و معاها بوكي ورد
لينا:برية و بوكي ورد؟؟؟هات نشوف...مدتهملها الورد كيما لي كان يبعتولها حسام..فتحت البرية بلهفة قراتها قلبها هرب من بلاصتو عينيها خرجو بدنها يرجف...طاحت في لرض ترجف
سورية:لينا...لينا واش كاين فالبرية
لينا:منى...منى وين؟؟؟
سورية:منى عندها نص ساعة ولا كثر ملي خرجت..علاش تسقسي عليها واش كاين لينا.........خلات سورية في حيرة و خرجت طيارة ركبت طونوبيلها و قلعت..عيطت لمنى تليفونها يصوني و ماتردش زادت تقلقت و زاد خوفها....عيطتلها مرتين ماردتش المرة الثالثة هزت بصح لي حكى معاها مش منى...
لينا:الو..الو منى راكي بخير..
؟:واش تقربلك مولات التليفون؟؟؟
لينا:هي...هي اختي...وين راهي
? :مدام اتهدن و اسمعني..اختك تعرضت لإطلاق نار...راهي فالسبيطار و حالتها مستقرة.......راحت للسبيطار لقات منى دخلت عندها عنقتها و تبكي بالشحقة....
لينا:سامحني منى...سامحني انا سباب لي صرالك
منى: ماتحكيش هكذا..شوف هاني مازلت نعيش و نعكرلك حياتك على قد مانقدر..هههه
لينا:هههه....ارتاح و دير لي تحب ماعادش نعاندك ولا نمنعك........هوما يحكيو و البوليس دخلو كان جواد و زوج رجال معاه..
جواد:ان شاء الله تكون بخير...تقدر تحكيلنا واش صرا بالضبط من غير كذب...دور خزر في لينا
منى:امم...كنت نخدم و كي كملت كنت مروحة و فالطريق لقيت طونوبيل حابسة و بيبانها الكل مفتوحين..هبطت نشوف واش كاين لقيت زوج رجال وجوهم مغطيين و كل واحد فيهم هاز سلاح...واحد فيهم قالي وصل سلامنا للينا..من بعد سمعت صوت الرصاص و مافطنت غير لقيت روحي هنا فالسبيطار...هذا لي صرا
جواد:اممم...يعني لي تعداو عليك يعرفو لينا؟؟
لينا:ايه حسام لي عمل هكذا..
جواد:متأكدة من كلامك؟؟حسام فالحبس
لينا تغششت و عادت ماتضويش..._ايه متأكدة بلي حسام هو لي دار هكذا...و هذا كامل على خاطر عاونتكم تحكموه....هوما يحكيو و فرملية دخلت و في يدها بوكي ورد...شافتها لينا تفجعت نحاتولها من يدها و قعدت تقلب فيه و تحوس
منى:لينا على واش تحوسي؟؟؟..ماردتش عليها و قعدت تقلب فالبوكي حتى لقات برية جبدتها قراتها...رماتها في لرض و خرجت تجري دموعها على خدها سابقينها...منى و جواد بقاو حايرين مافهمو والو..هز البرية قراها**منى بخير...بصح نجية لا....الحق عليها قبل ماتاكلها النار...انت بديتي اللعبة و انا ننهيها و على طريقتي**...خرج من السبيطار و عيط لعُدي و خبرو بكامل واش صرا و الحالة لي خرجت فيها لينا من السبيطا.......ركب طونوبيل و طار طيارة يسوق و يدعي في ربي يلحق عليها بخير يعرفها تخاف من النار...لحق لقا النار لاهبة في دارها و الناس دايرين..رجال الحماية المدنية يطفيو فالنار...حوس عليها بعينيه لقاها تحاول تدخل للدار و واحد من رجال الحماية حاكمها...راح يجري ليها...كانت في حالة هستيريا تبكي و ترجف كي لفلوس الصغير...وجها شاحب نظرة عينيها جامدة بدنها كامل يترعد...شعرها تشكرد حالتها حليلة...جبدها عنقها و خباها في صدرو...كانت تهتري و تقول كلام...._نجية لا ماتروحش كيفهم و تخلي ولادك يعانيو لي عانيتو انا...لا نجية لا...ماما...بابا...لالاااااااا....رامي....لالا....رامي...ماماااااااااا......بابااااا..لالا ماتروحوش و تخلوني وحدي..لالا....رامي شكون بيا غيرك..لمن تخليني...رامييييييي.....را..را..مي....فقدت اعصابها و داخت بين يديه هزها طلعها لسبيطار.....نجية و لمياء الحمد لله قدرو يخرجو حيين صحيح تحرقو شوية بصح كانت حروق خفيفة داوهم لنفس السبيطار
الحلقه 40
دخلوها لسببطار قالو الطبيب عندها انهيار عصبي و لازم ترتاح يومين ولا ثلاثة فالسبيطار...حط عليها حراسة و راح للحبس..دخل عند حسام...كل واحد فيهم يخزر فالثاني
حسام:هههههه جيت سي عُدي ان شاء الله لينا بخير
عُدي:يا كلب اذا صراتلها كاش حاجة صدقني نشرب من دمك
حسام:هههه كانت ممثلة فالقمة صدقتها و حبيتها و وثقت فيها صح..مع لخر ظهرت تخدم مع البوليس و كلش كذب في كذب...ههه لي يخدع حسام يلقا جزاؤو
عُدي:قولي شكون معاك حسام...شريكك هو لي ورا هذا الكل...كمال حاتم لي ورا هاذ الشي..حسام تعقد لسانو مالقاش واش يقول من وين عرف بلي كمال شريكو و بلي هو ورا لي صرا...._هه شكون قالك كمال شريكي...اصلا مانعرفوش
عُدي:هههههه فالوقت لي انت قاعد فالحبس و تخبي عليه كمال قاعد برا يدور و يحوس و يتمتع بدراهمك...تتتتتت و انت تقعد تتعفن هنا...هههههه خسارة يا حسام......خلاه يتحسر و يعض في صوابعو ندم و خرج بعد ماتأكد بلي كمال هو ورا الشي هذا....رجع للسببطار طمن على منى و لمياء و نجية و راح عندها للبيت...قعد حذاها شدلها يدها كانت راقدة كي الملايكة لي يشوفها ضرك يكذب اذا هي لي كانت تعيط و تخبط من قبيل.....باسها من خدها و قعد مقابلها...طاح الليل و هو قاعد يتفرج معاها...بدات تفطن فتحت عينيها بالشوية تفكرت نجية ناضت مخلوعة...حبسها و قالها بلي نجية و لمياء بخير...رجعها للسرير..
لينا:من وقتاش انا هنا؟؟
عُدي:من الظهر و انت هنا....دارك تحرقت و ماقعد منها والو
لينا:حتى البيت المغلوقة؟؟
عُدي:حتى البيت المغلوقة....شريك حسام لي كان ورا شي لي صار...كمال..كمال حاتم.......كلامو طاح عليها كي الجليد كانت تحوس عليه و ضرك جاها برجليه...._ههه كمال حاتم.....علاش مستعجل على نهايتو؟؟
عُدي:لينا تعرفو؟...ناضت من السرير وقفت قدام التاقة خزرت لبرا كان الليل و المطر طيح من السما...دورت ليه تبسمت و قالتلو:كمال حاتم..هههه كمال عمي.....عُدي ماستغربش اجابتها اذا كان محمد حاتم باباها فاحتمال يكون كمال حاتم عمها كبير...لعبها مش عارف و قالها:عمك؟؟كيفاش عم يحاول يقتل بنت خوه.....هنا قررت تحكيلو لي صرا في حياتها الكل...تفرغ قلبها لي عشرين سنة معمر احزان و الام و قهر...قررت تفتح ابواب الماضي و تبوح بأسرارها للانسان لي تحبو و توثق فيه...للانسان لي تحس معاه بالراحة و الامان..الامان لي فقدتو من حياتها لمدة طويلة ...
الحلقه 41
حياتها قصة اليمة و ذكرياتها جراح دفينة...قررت اليوم ترجع للماضي لأخر مرة قبل ماتحقق انتقامها و تاخذ بثارها...خزرت فيه و تنهدت...._العم عمر خبرني بلي صرا في دار العجزة
عُدي:.اسمع..
لينا:من غير ماتحكي عُدي نعرف بلي كنت تحوس على ماضي بنت الليل....اليوم تعرف لي حاب تعرفو و مابقاش داعي تحوس و تبحث......اااااف...اسمي مش لينا ناصر....انا توبة حاتم بنت المحامي محمد حاتم و مريم علي...كنت عايشة مع والديا حياة كل طفل صغير يتمناها...بابا كان مدللني و ماما تحبني بزاف...كنت المفششة تاع الدار لي نطلبو يجيني على طبق من ذهب....بصح السعادة لي كنت فيها ماكتبلهاش ربي تدوم...كمال خطف والديا مني و خطف معاهم حياتي و سعادتي و برائتي و طفولتي هذا الكل على جال الدراهم....جدي كان عندو المال و الخير و قبل ما يموت عطا كل واحد من اولادو حصتو من المال...بصح كمال كانت كرشو كبيرة كان عينو يستولي على كامل الثروة لي خلاها جدي..الدراهم عماولو عينيه خلاوه يقتل خوه الوحيد بقلب بارد..كان نهار كيما ليامات الكل ماما كانت فالكوزينة و بابا قاعد فالصالون و انا خرجت للجردينة نلعب...كنت نلعب و ماعرفاش واش لي قاعد يصرا فالدار...دورت لقيت النار شاعلة لاهبة...بقيت نخزر ماقدرت ندير والو...ماما و بابا لداخل قاعدين يموتو و انا برا نخزر فالنار كيفاش قاعدة تدي فاغلى ناس على قلبي...تلمو الناس باش يطفيوها جاو رجال الحماية و بعد مدة طفاوها و مابقا غير الرماد و دخان كحل طالع فالسما...هزوني بعدوني باش مانشوفهمش مخرجين والديا مفحمين....تحرقو حتى ماتو و هوما حيين..
عُدي:بصح كاين سجلات فالسبيطار تأكد بلي محمد حاتم و مرتو توفاو في حادث سير
لينا:كمال زور موتهم باش يخرج من دائرة الشك....بعد موت والديا كمال حاول يستولي على كامل املاك بابا الثروة لي خلاهالو جدي و دراهمو لي تعب عليهم سنين حياتو...بصح تفاجئ بعد مالقا وصية تقول في حالة موت محمد و زوجتو مريم كل الاملاك ترجع بأسم بنتهم توبة و اذا ماتت توبة قبل ماتكمل 18 سنة كل الاموال تروح لفائدة الجمعيات و المنظمات الخيرية...كانت صدمتو كبيرة وقت لي عرف و كنت انا الوسيلة الوحيدة لي يبرد فيها غشو الكبير....كان معيشني حياة الكلاب احسن من حياتي...يضرب يسب يشتم...ردني خديمة في دارو بعد ماكنت بنت العز و الدلال في دار بابا...الضرب البرد الجوع العرا و الخدمة من النهار لليل..
الحلقه 42
هذا الكل و انا بنت الخمس سنين..مارحمش ضعفي و حزني على والديا تمرمدت و عشت الويل معاه...قدام الناس يعاملني مليح باش مايشكوش فيه...الحاجة الوحيدة لي استفدتها من ادعاءاتو هي قرايتي...كان يخاف من كلام الناس على هاذي كان يخليني نقرا...كبرت و كبر معايا الكره و الحقد لي من عمر الخمس السنين و هوما عايشين معايا....وقت لي كملت 15 سنة كمال قرر يزوجني لوليد صاحبو لي قدملو عرض مغري بزاف و ماقدرش يرفضو...رامي راجلي كان عمرو 23 سنة...داوني عروسة و انا مانعرفش حتى واش معناه زواج..واش معناه يكون عندك راجل..عندو عليك حقوق و واجبات...رامي كان شاذ جنسيا ماكانش يستهوي البنات...كان يعاملني مليح عمرو لا قرب ليا ولا اذاني....كان يعتبرني اختو الصغيرة كنت نحس بالامان معاه...بصح كمال رجع و اشباح الموتى رجعو معاه باش يزيدو يخطفو رامي و يديوه معاهم.... صراو مشاكل بين كمال و صاحبو و دار عليه و رفض يعطيه لي وعدو بيه...كمال تعماو عينيه و قرر ينتقم بصح مافرطش فالجاجة لي تولدلو الذهب....قرر يقتل رامي و باباه و يرجعني للحبس لي كنت فيه....و بنفس الطرقة لي قتل بيها والديا زاد قتل رامي
الحلقه 43
كنت معاه وقت لي شعلت النار فالدار حاولنا نخرجو ماقدرناش تحاصرنا لداخل....بابات رامي لحق علينا و قدر يخرجنا بصح الله غالب ربي قضا امانتو و رامي مات بعد ماتحرق حروق بزاف و انا دخلت لسببطار قعدت فيه مدة طويلة نتعالج ودرت عمليات تجميلية تبدل فيا كلش مابقيتش توبة لي كانت حتى وجهي تبدل....بابات رامي نشر شائعات بلي وليدو و مرتو توفاو فالحريقة لي صرات فالدار....كي عرف كمال بلي توفيت جن جنونو و هبل اذا توفات توبة الاملاك كلها تروح للجمعيات و المنظمات كان لازم يدير حاجة ترجعلو الدراهم كامل...جاب طفلة عيشها معاه على اساس هي توبة بنت محمد....و رجعت كامل الاملاك بأسمو.....بابات رامي تهلا فيا حتى نهار مات...ولات عندي فوبيا من النار وقت نشوفها ولا نسمع كلمة نار يصرالي انهيار عصبي...كل ليلة نشوف كوابيس و منامات خايبين...ماعدتش نقدر نحط راسي على المخدة نخاف نرقد و نشوف ماما و بابا و رامي يموتو محروقين..نخاف نحط راسي على المخدة نشوف كمال و هو يعذب فيا....رجعت بشخصية جديدة...رجعت لينا ناصر باش ناخذ حقي من كمال...و باش ندي حقي كان لازم نجمع عليه معلومات وين نلقاه و وين يكون و البار كان انسب بلاصة نقدر نجمع منها المعلومات....اااااه كنت توبة و رجعت لينا بنت الليل...خزرت فيه عينيها في عينيه شافت الندم و الحسرة فيهم..
عُدي حشم منها هبط راسو للرض...شحال غلط في حقها و هي ساكتة و مردتش عليه...شحال ظلمها بكلامو..سحال جرحها و بكلامو وجعها...ماكفاهاش وجع السنين هاذو الكل زاد عليها هو بسوء الظن و الكلام الخايب...غلط في حقها و لازم يطلب السماح ._سامحني لينا على كل كلمة قلتها في حقك...ظلمتك و جرحتك سامحني
لينا:ههههه يا ضابط متعودة بيك قوي و حازم.. مش راسك في لرض....عُدي هز راسك و اخزر فيا....هز راسو قعدت قدامو وجها في وجهو عينيها في عينيه..تفرفش و مالقاش واش يدير..._القوة لي كنت تشوفني بيها كنت نديها منك...كنت كل مانشوفك نشوف القوة و العزيمة لي عندك باش تخدم بلادك و تحقق الهدف لي مسطرو في حياتك...كنت كل مانفشل ولا نفقد ثيقتي في نفسي نخزر ليك و ندي القوة منك....انت لي كنت تعطيني القوة باش نكمل...و على هاذي ماتحتاجش تطلب السماح مني...صحيح كلامك كان قاسي و يوجع..بصح عمري لا حقدت عليك ولا كرهتك.....بعدت عليه شوية و تنهدت حطت يدها على قلبها...._بالعكس هذا القلب حبك و عشقك....
عُدي:لينا..انا..
لينا:لا ماتهتمش علابالي ماتحبنيش....حبيتك و ماكنتش نستنا فيك تبادلني الحب....ااااه و اكيد مانكونش عائق في حياتك.....
عُدي:انسا الماضي و ابدا حياة جديدة بعيدة على عمك...
لينا:اذا خذيت حقي و حق ماما بابا و رامي بلاك نقدر نرقد و انا مستراحة...بلاك ماعادش نشوفهم في منامي و هوما يتعذبو....نهاية كمال هي نهاية مأساتي...
الحلقة 44و الاخيره
فاتو يومين و لينا فالسبيطار...عُدي متهلي فيها و قايم بكل امورها مازال ماعترفلهاش بلي يحبها...كان يوجدلها في مفاجأة يطلبها فيها للزواج...اليوم تخرج ناض بكري فرحان عدل روحو و لبس كوستيم شعرو ممشوط الله الله و لحيتو معدولة ريحة البرفان تضرب لبعيد....راح للكوزينة عند فاطمة و ميادة سلم عليهم و قعد يفطر
فاطمة:ربي يدوم الفرحة يا وليدي....
عُدي:ان شاء الله يما
ميادة:و نقدرو نعرفو الفرحة هاذي كامل علاش؟؟؟
عُدي:ههه فطومة مش مقلقة عليا وقتاش نتزوج..هاني رايح نجيبلك عروستك
فطومة تزغرت و ميادة تعنق فيه...._مبروك يا وليدي و شكون هي نعرفوها؟؟؟
عُدي:وجدلنا عشا مليح و العشية تعرفها...و تفرح بيها.....خرج و خلا فاطمة و ميادة يخممو شكون هي...راح للسبيطار و الفرحة ماليا وجهو اليوم باش يعترفلها بحبو اليوم يطلب منها تتزوج بيه و يعيش السعادة و الفرحة و الحب الافلاطوني معاها.....دخل لبيتها مالقاهاش..فوق المخدة لقا سلسلة و معاها برية فتحها قراها**لحقت اللحظة لي كنت نستنا فيها عشرين سنة...اليوم توبة تاخذ ثارها من عمها..اليوم باش يذوق من الكاس لي ذقت انا منو...اليوم آخر فصل من فصول حياة توبة.....عُدي هاذي السلسلة غالية عليا خليها عندك تذكار مني...كي تشوفها تفكر #بنت_الليل لينا**...قراها فشل رجليه ماهزوهش...حس بالدنيا ظلامت في وجهو و رجعت غدرت بيه و رجعتو لسابع ارض...النفس تقطع فيه...حس بغصة في قلبو...واش يصرالو اذا راحت و مارجعتش كيفاش يعيش بلا بيها بعد مالقاها و رسم حياتو معاها.....جبد التليفون عيط لجواد خبرو بواش كاين و قالو يحوس على كمال حاتم...شوية و عاود عيطلو جواد عطاه عنوان الفيلا تاع كمال....خرج طيارة راح مالقا كمال مالقا مرتو....عرف بلي هي لي خطفتهم و ماخلات حتى دليل وراها بلي كمال و مرتو مخطوفين.....قعد يخمم وين يلقاها وين ممكن تديهم.....رجع للسبيطار عند منى
عُدي:منى تعرف عنوان الدار لي كانت ساكنة فيها لينا مع والديها؟؟؟
منى:لالا مانعرفوش..
عُدي:منى اتفكر...لينا في مشكل و لازم نلحقو عليها قبل مادير حاجة تخلينا نخسروها...اتفكر منى
منى:صدقني مانعرفش وين العنوان....ممكن لمياء تعرف....عيطتلها و خبرتها بالعنوان......راح رجليه فوق راسو...لحق شاف طونوبيلها حابسة قدام دار آثار الحريق باينة عليها....دخل الدنيا ظلمة كانت خرابة وين تحط رجلك ماكانش...قعد يحوس حتى شاف راجل و مرا مربوطين فوق كرسي و لينا واقفة مقابلتهم....اول مرة يشوفها هكذا البراءة لي كانت في وجها راحت و نظرة عينيها تبدلت....كانت جثة لا حياة فيها...جثة تتغذى على الحقد و الكره و هدفها الاساسي هو الانتقام....بدا يعيط عليها...ليناااا...ليناااااا....ماداتهاش فيه راح يجري حكمها من كتافها و دورها ليه...هزت السلاح لي في يدها و ضربتو برصاصة ليدو طاح في لرض يتوجع و الدم يشرشر من يدو
عُدي:ليناااا...اسمعني لينا ماديرش حاجة تندم عليها....
خديجة:ايه..ايه اسمع كلامو تندم و الله تندم...
لينا:ههه...علاش انت ندمت خديجة؟؟وقت لي شاركت راجلك في كل جريمة دارها...قتل خوه و مرتو و قتل رامي وليد صاحبو و لمياء و منى و نجية...ندمت..جاوبني ندمت خديجة...
كمال:شكون انت؟؟؟و كيفاش عرفتي هذا الكل؟؟
لينا:ههه نسيتني يا عمي؟؟؟هاذي انا توبة...
كمال و خديجة...لالا توبة...ماتت...توبة ماتت مع راجلها ماتت...
لينا:هذاك لي كان في بالك....انا توبة و رجعت باش ندي حقي منك....مالا تحب تحرق الناس و هوما حيين؟؟؟و يادرا تحب تجرب لي جربوه قبل مايموتو ولا لالا......كمال و خديجة عادو يرعشو ماخصهمش يشمخو رواحهم يبكيو و يتوسلو فيها ماتقتلهمش...._ولا تحب نحطلك رصاصة بين عينيك..؟؟
كمال:لالا...ماتقتلنيش انا عمك نسيت؟؟؟......هزت السلاح لي في يدها و حطتو بين عينيه....كانت تشوف في يماها و باباها و رامي واقفين مقابلينها و كل واخد فيهم يقولها اعطيني حقي من الظالم...اقتل القاتل....عُدي كان غير يعيط عليها يترجا فيها ماتقتلهمش...
عُدي:لينا ماتقتلهمش...لينا اذا قتلتهم واش راح يكون الفرق بينك و بينو....ليناااااا لا متوليش مجرمة كيفهم خليك نظيفة من دمهم....لينااااااااا.....ليناااااا.....توووووووووبة ماتقتلهمش......طاحت في لرض تبكي بحرقة كبيرة في صدرها...تبكي بالصوت...ناض يمشي و شاد في يدو لحق عندها جبدها عنقها و زير عليها في صدرو....هي تبكي و هو يبكي معاها...._توبة نحبك...نحبك
لينا:...
عُدي:امم...نحبك و مانقدرش نبعد عليك..حياتي بلا بيك ماتسواش...اوعدني ماتبعدش عليا......
..............بعد عام...........
_كمال و خديجة حكمت عليهم المحكمة بالسجن المؤبد مع الاشغال الشاقة..بعد اثبات تورطهم في جرائم القتل العمدي ..تجارة المخذرات...حيازة السلاح...الدعارة و التجارة بالبنات القاصرات...التزوير و السرقة..
_ميادة و خطيبها مراد تزوجو و راهي حامل فالشهر الثامن...
_منى شرات دار و عايشة فيها مع نجية و لمياء و مازال مالقاتش شريك حياتها.
_عمي عمر توفى بعد ما مرض.
_توبة و عُدي تزوجو و عايشين احلى ايام حياتهم في دارهم....
............النهاية..ايا مدولنا رايكم ف لحكاية باه نجيبلكم وحدة اخرى شابة
ليست هناك تعليقات:
إرسال تعليق