صلاح عاد يجي ديما للفاك انا سعات نسلم عليه و ساعات نلعبها ماشفتوش كانو الدكاترة كامل متعجبين مني و من الإنضباط و الذكاء تاعي انا و عبد الجليل ديما مع بعضانا بصح لا علاقة محددة هو يحب يقعد معايا و يسقسي عليا و انا كيف كيف .
نهار جيت داخلة نقرى نلقى عبد الجليل قاعد مع المصفارة تاع سارة أكبر متكبرة في الجامعة و زيد حاطة يدها على كتفو أنا تلفتلي الطريق عينيا تعباو دموع بدلت الطريق و عملت روحي ماشفتوش هو يعيط عليا، بصح حقرتو و مشيت حتى نشوف صلاح داخل نسلم عليه و نكروشي في ذراعو و نقلو جابك ربي مافهمتش واحد الحاجة معليش تفهمني ؟؟ و جليل كان ماشي من ورايا صلاح ما فهم فيها والو بصح عجبو الحال .
حتى نسمع جليل يعيط دار عندو صلاح سلمو على بعضاهم و انا غير نشوف ....؟؟
ظهرو صحاب الروح بالروح تباااا. ... و جليل يقلي منين عرفتي صلاح أنا خفت يحكيلو و يعرف حقيقة أني متشردة ... السخانة طلعتلي ..
صونا تلفون صلاح .
أنا قلت لجليل غير بالشوي شفتو في السبيطار نهار مرضت يما.
فاتت على خير . أنا مازلت مشنفة على جليل و هو يقلي راكي تعرفي سارة تحب تڨسر و عندها كل شي نورمال راكي أنتي الصح .
جاء نهار خرجت على 4 باه نروح للخدمة و جليل غير خليني نوصلك و انا ماحبيتش و توترت ياسرخفت يفيق بيا .
تبعني جليل خاتر توسوس يحساب عندي واحد أوخر وصلت لباب المتوسطة تلاقيت المدير سلمت عليه و دخلت .
غدوة كي رحت نقرى لقيت جليل يستنى فيا الصباح قالي درك تفهميني وعلاه ماقلتيليش أنك بنت أستاذ عمر مدير المتوسطة الي قريت فيها .
أنا مالقيت مانهدر سكتت و خلاه .
فاتت الأيام و جليل مازال يحساب أني بنت المدير و كل يوم يوصلني للمتوسطة نخدم فام دوميناح و هو يحساب فيا ساكنة ثم .
ماكانتش عندي الجرأة نحكيلو قصتي فضلت نعيش حلم يفرحني خير من حقيقة تجرحني
كل يوم نتعلقو ببعضانا و تطورت علاقتنا لحب عاد الهواء الي نتنفسو .
بصح الفرحة ما تكملش في أغلب الأحيان هذيك المصيبة الي إسمها سارة كانت تعشق في جليل و تكرهني و لكن تلقى الموت تشريهالي كانت دير في تحرياتها عليا و عرفت كل شي من النهار الي جيت فيه من دارنا.
نهار كنا كامل قاعدين في لافاك أصحاب جليل و صحاباتهم تقريبا كنا 10 و من بينهم سارة حتى تسقسيني
سارة :واش أحلام الخدمة في السيام مليحة راهم يخلصوك مليح؟
و ماتت بالضحك أنا تمنيت تتحل الأرض و تبلعني .
جليل مسكين يقلها راهي بنت المدير موش تخدم ثم ...!! القروب كامل حبس الهدرة و يسمع في حكاية التشرد تاعي و انا غير نقفل في وذنيا و هذيك اليهودية تاع سارة تحكي فيها كأنها قصة هزلية و الغاشي كامل يضحك و يشوف فيا على أني كذابة .#daddou
رحت نجري و انا متمنية نرجع لدوارنا نلبس قشابية بابا و نسرح غنماتي كيما كنت واحد ما يعرفني .
جليل يسقسي فيا أحلام الي سمعتو صح ؟ أنا قتلو هيه صح كنت عايشة في دار العجزة و نخدم فام دوميناج في السيام هذي هي انا فرات الي بناتنا فض .
ليلة كاملة نبكي على زهري الي كيما نديرلو ما يتسقم علاه الحاجة الي نحبها تروح مكتوبي نعيش وحدي كرهت لافاك و لقراية .
نهار بعد نهار نروح عند أنسة رقية نحكيلها الي يصرالي و نبكي شوي و نروح
جاء نهار عرضتني باه نتعرف على بنات ولدها "ضحى "و "نور "و ولدها .تعشينا كيف كيف و كان صلاح راح ياكلني بعينيه و باباه يشكر فيا و يقلي يما حكاتلي كيفاه قدرتي توصلي وحدك موشي كيما واحد العباد. هههه " يشر على صلاح " . و صلاح في عالم أوخر يشوف معايا و القلوب تخرج من عينيه ..
أنا قلبي معلق مع عبد الجليل غير نسهى نخمم فيه قريب نهبل أنسة رقية نصحتني ننساه و نخمم غير في قرايتي بصح ماقدرتش ماحطيتش مشاعري تزيد تتحرك على راجل بعد الي شفتو من جنس الرجال بصح كل ما نشوف في عينيه نحس بالحنانة الي فقدتها من أقرب الناس ليا و حرمتني منها الدنيا .
فتحت معايا أنسة رقية موضوع الزواج و كان النقطة السوداء في حياتي الجرح المدفون الي عندو 7سنين ما خبرت عليه حتى واحد عمري 21سنة و مازال كاين ليالي نوض من النوم نبكي كأنه واحد يغتصب فيا نشوف هذوك الوحوش الي غتاصبوني .
أنا جاوبت من غير ما نعرف حتى شكون العريس لا مانتزوجش.
رضيت اني مستحيل نعيش قصة الحب الخيالية الي تحلم بيها كل طفلة في عمري حتى عبد الجليل نحيتو من بالي و هو ثاني مازادش سقسى عليا .
عام من عمري راح ما فيه حتى جديد نخدم و نقرأ لا صاحبة ولا حبيب عرفت أنو الماضي تاعي مهما عملت و مهما نجحت مستحيل يبدل نظرة الناس ليا .
تلاقى صلاح و عبد الجليل و بداو يحكو عليا :
جليل :كذابة ماقاتليش على المركز و الخدمة .
صلاح : الطفلة فحلة رغم ظروفها و الي عاشاتو قدرت توصل و هذي الحكايات كل كنت علابالي بيهم و حبيت نشاورك باغي نخطبها .
جليل: والله مانعرف (دخل في بعضاه كيفاه يقول ل صلاح أنو كان معيا و مازال يحبني لذرك )
صلاح: أنا الطفلة تعجبني من أول نهار شفتها فيه في السبيطار خطفتلي عقلي
جليل قريب يبكي حاب يقلو راني شفتها قبلك و عشقتها قبلك و مازلت نحبها و علابالي حتى هي تحبني بصح صحبو العزيز كتمها في قلبو و سكت .
صلاح : غدوة نتلاقاها و نقلها .
جليل : ربي يسهل .
ليلة كاملة جليل يعيطلي و ماحبيتش نهز عليه حتى وصلت الربعة تاع الصباح بعثلي ميساج قالي ماتقبليش مازلت نحبك .
أنا مافهمت والو حتى لغدوة كي تلاقيت صلاح .
صلاح علابالي ناس ملاح و ولد فاميليا و قصدني رغم ظروفي بصح الحقيقة الي مخبيتها ماضنيتش حتى واحد يقبلها .
مازلت واقفة مع معاه حتى نلقى جليل جاي عينيه سارني باين كان يبكي قالو صلاح راك صحبي صح بصح هذي الطفلة نعشقها و راهي حبيبتي حتى للنهار الي نموت مانتخيلش تزوج راجل غيري خاصة واحد صحبي .
و بدات المعركة بيناتهم قريب طيح الروح خصت غير لابوليس ماجاوش صلاح هبل قالو خدعتيني و فسدتي عليا و خلي الطفلة تخير الي تحب شكون قالك تبغيك .
أنا الدقيقة هذيك فاضت الكاس و قررت نكشف الي كاين كل وعلاه عايشة حياتي خايفة كيما الي عمل جريمة الي يحبني خلي يحبني على حقيقتي .
حكمت صلاح و جليل من يديهم و انا نبكي و نعيط و قلتلهم نشوفكم بعد الي راح تسمعوه راه تقعدو تتعاركو عليا ولا لا .
من بعد ركبت مع جليل في الطوموبيل و قلت لصلاح إركب و بدينا نمشيو و انا نعتلو في الطريق روح منا روح منا .....وصلنا لبلاصة في وسط الجبال قتلو حبس و بديت نطلع في الجبل و نقلهم تبعوني في زوج مافهمو فيها والو غير يتبعو فيا يحسابو فيا هبلت و انا نبكي دموعي ماحبستش وصلت لدارنا .
وقفت في وسط أرضنا الي كانت جنة و رجعت معبيا شوك ، حوست على شجرة الزيتون الي زرعتها ماما لقيتها كبرت و هما غير يتبعو فيا من غير كلام وقفت تحتها و قلتلهم تعرفو هذي واشي هذي هي دارنا و هذي أرضنا و هااااذاك قبر يما و بابا و هنا و تحت رجليكم قبري انا صلاح و جليل غير يشوفو مافهمو فيها والو .
قلتلهم هنا مت كي كان في عمري 14 سنة هنا خليت طفولتي و برائتي و شرفي الي داوهولي سيف عليا هنا عذبوني و غتاصبوني وحوش موش عباد صغيرة باباه مريض غتاصبوها و احد ماجبلها حقها . نرقد خايفة في جنب بابا العاجز خايفة من الليل و النهار و ماخليتوش مات وحدو حتى مات بين يديا
هيا تعاركو عليا ضرك هيا كل واحد فيكم يروح يعيش حياتو هيا روحو خلوني ما تحبوني مانحبكم هيااااااااا روحوووووو
صلاح هبط راسو في الأرض و راح .
جليل جاء قعد قدامي أنا نبكي و نشهق بالصوت حكملي راسي حطو على كتفو و يسكت فيا .
حتى طفيت النيران كل الي في قلبي سكتت و وقفت رايحة نروح كحملي جليل يدي و مشينا في نفس هذيك الطريق الي مشيتها قبل 4سنين بالخوف مشيتها و انا حاسة بالأمان كأنها حجرة و هبطت من فوق صدري ركبنا في الطوموبيل قالي جليل .
أحلام أنا حبيتك من غير مانعرف حتى حاجة عليك و عام و انا زعفان عليك أنك خبيتي عليا حقيقتك موش خاتر ظهرت هذيك هي حقيقتك الي هدرتيه كل مايهمنيش تهميني أنتي خاتر عشقتك النهار الي شفتك تجري في الطريق كي المهبولة و مايهمنيش كلام الناس خاتر نعرفك فحلة أكثر من كل البنات الي شفتهم في حياتي و الشرف موش هذيك الحاجة و فرات الشرف هي الطفلة الي تصون عرضها و ترضي والديها و انا يشرفني تكوني أم أولادي حتى بعد الي قلتيه كل .
أنا :موحال تنسى و يجي نهار و تندم .
جليل حضني لصدرو بقوة و خزر في عينيا و باسني و كانت أول بوسة في حياتي حسيت روحي عاودت حييت بعد ما متت .
قررنا نتزوجو بعد ما نكملو قرايتنا أنا و هو .
جليل كمل القراية و فتح كلينيك و انا كملت و كنت الماجور دو برومو في 7 سنين و بعثوني بعثة للخرج عملت التخصص تاعي في جراحة القلب و الشرايين . حتى في الخارج كنت من المتفوقيين و رجعت لحبيبي حددنا موعد العرس و وجدت كل شي كيما دير كل فتاة كان والد صلاح هو الوكيل تاعي نهار العقد و صلاح كان أحن أخ و صديق قالي الي حكيتيهولي خلاني نحس أني مانستاهلكش على هذيك إنسحبت راكي زدتي كبرتي في عيني . رجع مع جليل أصحاب أنا كنت نخدم في السبيطار ندير غير العمليات الصعيبة و المعقدة مع ليبروفيسار الكبار و كانت أنسة رقية هي أول يد تمدتلي في مشوار حياتي مستحيل ننسى خيرها و الدنيا مازال فيها الخير و كيما يقولو يقطع من جيها و يمد من جهة أخرى .
ليلة عرسي مع عبد الجليل نساتني في النهار الي غتاصبوني فيه و نسيت العذاب و الألم مع أكبر و أحن قلب عطاهولي ربي و أكثر من هذا كل يحتارمني و راح يكون بابات بنتي الي في كرشي .
العبرة "و بشر الصابرين الذين إذا أصابتهم مصيبة قالو إن لله و إن إليه راجعون.
النهاية ......
Siso
هايلة 😍😍😢
ردحذف