تحضيرات قبل الشوفة ولا الخطبة

هااي فنفونات 
جيت نهدرلكم على السوجي تاع الخطبة ولا الشوفة باسكو راهم يقولو حقرناهم و متهاليناش فيهم هههه
راني حابة نهدرلكم بالتفصيل باش نهار يلحق الموعد ديالك متحصليش و تكوني موجدة روحك و مرتاحة  

لازم تبداي توجدي روحك سمانة من قبل اوك ...
الحاجة لي تبداي بيها هي نتي ...وي تبداي بروحك ..لازم تتهلاي فروحك كثر هاد السمانة باسكو راهم جايين يشوفوك ولا يخطبوك نتي شخصيا ...اما الماكلة و الديكور و و هادو كامل زيادة ..الصح هو نتي 

اللبسة تشريها ولا توجديها من قبل اوك

شعرك حنونة تهلايلي فيه نسحقك تغسليه كل يومين و ديريلوا ماسك هذا لي راح نقولك عليه زوج مرات فالسمانة قبل ميجو
الماسك: فنجان صغير معمر بشامبو تاع البيض +صفار بيضة+4مغارف زيت زيتون +مغرفة عسل حر ..ادا معندكش عسل مديريش نورمال
ديريه فشعرك فالليل و اغسليه صباح و رديلي بالخبر 
شعرك متجبديه ما تنشفيه حتى نهار يجو خليه يريح مالسيشوار و ليسور 

وجهك يا حبيبتي لي تقابلي بيه ..اذا عندك ليساغن ولا وجهك يتقشر يتزيت ...لازم تتهلاي فيه ..
عندك سمانة فيدك تكفيك و توفيك
وجهك ديريلوا شوية بودرة الحميصة (القرنطيطة) +حليب بارد ..خلطيهم مليح و حطيهم على وجهك مدة 10 دقايق و شوفي كيفاش يولي ...ديريه زوج خطرات فالسمانة
كل ليلة امسحي بماء الورد و ارقدي

ادا عندك ليساغن ديري شوية قهوة و زيت زيتون و حطيها تحت عينيك شوية و اغسلي

كل ليلة حطي زوج دوائر تاع لخيار على عينيك مدة 5 دقائق

ازالة  الشعر ..خلي شعرك يطوال شوية متنحيهش حتى نهار اللخر ...زعما هما يجو غدوة نتي نحي اليوم ...مادابيك بلاسير بليز ...
قبل متنحي الشعر الزائد قشري المنطقة لي تنحيها بشوية سكر و قهوة و زيت زيتون ..ادا معندكش قشريها غير بالتلوة تاع القهوة  و شلي بالماء مليح موراها نحي بلاسير ميم ولا الشمع كي تكملي ريحي شوية و ديري غالية ولا برنطانية و عاودي على البلايص لي نحيتيهم بصح متخليهاش بزاف باسكو تكوني نحيتي بلاسير و غالية ولا برنطانية راح تنحيلك الشعيرات لي يقعدو و تاني تعطيك ترطيب هاااااايل...جربيها و قوليلي 

اليوم راهم جايين 
ترقدي بكري و تنوضي بكري ..تروحي ديراكت للدوش ..تكوني دايرة الماسك لي قلتلك عليه فشعرك ..تروحي ديري تقشير لوجهك بشوية سكر و قهوة و زيت زيتون ..كي تكملي ديري الماسك تاع وجهك اغسليه و ادخلي دوشي تدويشة محصلتش ههه

كي تكملي ادهني جسمك بزيت جونسون ولا فازو ولا اي كريم عندك ...البسي و اعطي الحس لرجليك للحفافة ..اييي نسيت كولي كاش حاجة علابالي جيعانة كيما أنا ههه ...

كي تروحي للحفافة مديريش حاجة بيزار لالا سامبل اجبديه و لا ديريلوا بروشينغ تخافايي برك ولا تعرفي تجبدي فالدار نورمال ..بصح منيش حاباتك تعيي روحك 

مكياج سامبل حنونة اوك كلما تكوني طبيعية أحسن و تاني ميكومنتيوش و يقولو دايرة طابلو اوك الزين ..

كي تولي للدار البسي حاجة سامبل لي وجدتيها روبة طويلة شابة ولا طايور سامبل باهي المهم واش وجدتي البسي المهم يكون يجي قدك و يوالمك و اقعدي تستناي و متنسايش ديري سالفي

الطابلة تكونوا موجدينها من قبل حطو طابلة كبيرة فيها السنيوة تاع القازوز و العصير لازم تحطوهم في زوج  و زيدو لي رولي معاهم و القهوة و الحليب وجديهم كي يلحق وقتهم شعليلهم الفورنو برك و زيدي معاهم القاطو و اختميها بلاتاي مع مقروط
السنيوة لي يدوها معاهم تكوني موجدتها و مشبحتها بالحاشية

نولوا ليك نتي ...متدخليش مع الأول ..اصبري شوية و ادخلي فيدك حاجة حلوة ...تمر منقي مفيهش لعظم ولا طبسي حلوة ..قبل متدخلي اقراي سورة الفاتحة ..و قولي اللهم اشرحلي صدري و يسرلي أمري و احلل عقدة من لساني يفقه قولي .....بسم الله توكلت على الله ...عادودي ديري الريحة و تبسمي و ادخلي ..امشي بلعقل ظهرك مسقم تبسيمة متخطيكش ...

سلمي عليهم و روحي تقعدي ...بالاكي ديري رجل على رجل عييب ...اقعدي حطي يدك اليمنى على فخذك الأيسر فوقها يدك اليسرى  و كتافك طلعيهم و سلسي ظهرك ايوااااه كيما درتي ضرك هههه  و متكتريش الهدرة ..ادا سقساوك جاوبي ادا مسقساوش راكي ساكتة 
كي  يجو رايحين نوضي معاهم و بقيهم على خير و بالاكي تنساي السنيوة لي وجدتيهالهم تعطيهالهم يماك ولا ختك ولا اي وحدة  و ديريلهم الريحة كي يجو خارجين ..

ادا كنتي قادرة تشريلهم ريحة و ديودوغون اشريلهم و ديريهم فساشي شباب و مديلهم ساشية ساشية  للنساء لي جاو

و ربي يجيب لي فيها خير و كلشي مبرووووك لعقوبة لكامل لبنات
دعواتكم حبيباتي