بونسواغ زينات جبتلكم حكاية جديدة حزينة بصح مليحة فيها تشويق انشاالله تعجبكم :
صونا التلفون جبدتو من تحت لمخدة لقيتو يعيطلي الساعة راها ل11 وانا راقدة بالنوم كوبيت عليه منيش حابة نهدر ونضت غسلت وجهي وحكمت شعري وهبطت نستقهوا نلقا بابا قاعد يقرا فلجرنان سربيت فنجان قهوة وكاس ما وجيت طالعة لبيتي نسمع فيه يعرش كي عوايدو
يخي تربية يخي صباح لخير ومكاش ديجا وشمن صبح لخير الناس راح تتغدا ولالة تدي القهوة وماما تقولو خلي الطفلة بحالها درت روحي كامل مسمعتوش ورجعت لبيتي
نعرفكم بروحي اسمي منال عمري 19 سنة الزين منوصفلكمش روحي بصح يقولولي آية في الجمال مكانش واحد شافني ومعجبتوش ومحاولش يتقرب ليا صوا فزين ولا لاطاي بصح في حكايتي راح نبينلكم كيف يتحول الجمال من نعمة لنقمة وكيفاه أكثر واحد يآذيك هو أقرب الناس ليك
انا نقرا فالجامعة سنة ثانية صحاباتي رؤى و ضحى توأم وإسلام لي حبيتو وكان اول شخص عرفتو
انا الطفلة الوحيدة عند ماما وبابا لي يكرهني لأنو تمنى يكون عندو ولد وش ذنبي انا مفهمتش المهم مكرهلي معيشتي بأتم ما للكلمة من معنى وماما متقدرش توقف فوجهو يضربها حتى هيا
واحد اليوم دخل شارب كي عادتو جا ديراكت لبيتي حكمني مشعر كركرني عند لباب وغلقو الدنيا ليل وين نروح انا ؟ عيطت لصحاباتي قتلهم نجي نبات عندكم محبوش هنا كانت صح ضربة قاضية لقلبي درتهم خياتي وهوما أكثر واحد يعرف حالتي كيفاه قالولي مستحيل نقدرو ندخلوك ضرك بابا ميقبلكش داركم وحاوزوك
معنديش لافامي ومستحيل نبات فالشارع عيطت لإسلام نبكي بشهقة
هو : منال خير وشبيك ؟ واش هاذ لحس راكي برا ؟
انا : تعيش شوفلي حل ودموعي مخلاونيش نهدر
هو وين راكي راني جاي
جا وين قتلو لقاني بل بيجامة برا وبلا خيمار الناس كل تفرجو فيا وحالتي حالا قالي اطلعي ترددت من بعد قلت مكانش حل ثاني طلعت نحكيلو ونبكي جامي حكيتلو كيفاه عايشين كنت ديما نضحك لكن هذاك اليوم مقدرتش نزيد نحمل اكثر هو شافني هكاك عنقني قالي متخافيش ديريني انا كلش انا باباك وخوك ويماك ديري فيا كونفيونص وصلنا عند دارو قالي اهبطي انا مقدرتش ندخل حسيت روحي رخيسة صح مع هو كان يشوف معايا نظرات تخوف اول مرة يشوفني بلا خمار و بيجامة مزيرة خفتو قالي نوعدك ميصرا والو واذا حبيتي انا نبات فطونوبيل مهوش مشكل وليت هبطت معاه دارو تحسيها جنة فوق الارض دخلنا قالي ارواحي نوريلك بيتك باش تكوني آلاز دخلت وغلقت الباب ملداخل مالڤري نحبو منديرش فيه لامان رحت توضيت ونصلي ونبكي وندعي ربي يفرج عليا حتى لقيت روحي غفيت فوق السجادة نضت صبح قتلو نروح لدارنا جابلي قش بدلت ورحت طبطبت فتحلي بابا
شبعني سب يا الخامجة يا لق... تهبطيلي راسي على كبري وين كنتي بايتة وانا نبكي مخلاليش حتا الفرصة باه نهدر وماما تبكي من جيه وتقولو خليها تدخل جا راح يتلاح ليا يضربني شدلو اسلام يدو قالو متضربهاش قالي هذا هو الراعي تاعك ؟ راني متبري منك ماكي بنتي منعرفك انساي هاذ الدار حتا نشوف ماما طاحت فلرض هزيناها رحتا لصبيطار قالك طلعتلها لاطونصيون ودخلت غيبوبة بابا محوسش علينا كامل ماما بين لحياة ولموت وانا معاها فصبيطار صح لقيت اسلام واقف معايا بزاف وزدت عشقتو اكثر واكثر مخلانيش نحتاج يا لوكان شوي كان يخدم ويجي يشوفنا وماما حالتها غير تسوء اكثر واكثر درنالها كامل التحاليل فالاخير ظهر عندها ورم دماغي متطور يعني كانت تفوت فأيامها كي قالهالنا طبيب مجبتش خبر غير وانا متكسلة في سرير وصيروم في يدي واسلام قدامي وانا نبكي ونقولو ماما راح تخليني عندي غير هي وهو يعنق فيا وانا زايدة غير نبكي حتا جا طبيب عطاني مهدئات بعدها فطنت حكا معايا وعرفت لازم نرضا بقضاء ربي وليت نصلي وندعي ربي يخليهالي منطلبش بزاف هي دنيتي هي كلشي في حياتي اذا راحت هي نموت احسن معنديش حتى عائلة تقدر تأويني ولا تعوضني شوي من واش ضاع مني
شهر وحبيبتي فالصبيطار من بعد فطنت ونا قدامها شدتلي يدي وتبسمتلي قاتلي اسمحيلي بنتي مبقاليش اسمحيلي على كلش انا ثم خلاص حسيت روحي تطلع مني ونقوللها يا ماما متخلينيش ليمن تخليني كي تروحي قاتلي كاين ربي يا بنتي اصبري ونحبك وعاودت رجعت لغيبوبتها صح قريب هبلت تشوفي يماك تموت قدامك ونتي ما قادرة ديري والو من غير تدعيلها تشوفي اعز إنسان في حياتك يضيع من يديك بعدها بأسبوع طا الطبيب قالي إنا لله وإنا إليه راجعون حسيت نار شعلت في صدري قد ما نحكي ميحس بيا غير لي مجربها حسيت روحي مت وانا حية وزظت كرهت بابا اكثر واكثر هو السبةكرهلي حياتي وقتلي ماما بزاف يقولولي مكتوب ولحق الاجل لكن هو السبب درت فبالي بعد موتها رايح يحس بغلطتو ويحاول يصحح لكن مول الطبع ما يتطبع فاتو 3 أيام وانا كي لمهبولة مصبرني غير اسلام حباباتي محضروش الجنازةمنقولش جنازة ماما كانت جنازتي انا ... فاتو 3 أيام تفرقو الناس بابا قالي ملخر منحتاجكش مكيش بنتي بقيت نشوف معاه قالي ايه مكيش بنتي منيش باباك انا مربيك وهي ماشي يماك تان ونتي بنت حرام وتبقاي بنت حرام كلامو كان كي السكين فقلبي هذاك وين فهمت علاش جامي عاملني مليح وجامي حسيت بحنان الاب وفهمت علاش ماما طلبت مني السماح ... قالي ارفدي وش تسالي فهاذ الدار واهملي كيما كنتي هاملة رفدت قشي وشوي من قش ماما سوفونير دموعي مبقاوش يسيحو خلاص تبدلت 180 درجة وليت أقوى راحت منال الضعيفة ولحنينة رجع يسيطر عليا الغضب برك رفدت دوزاني وقتلو وكيلك ربي وخرجت معلاباليش وين رايحة نمشي برك تلفوني طافي والمطر خيط من االسما ... لقيت روحي عند لبحر قاعدة ولي رايح يرميلي كلمة ولي جاي يرميلي كلمة تان رحت للحانوت شريت دخان وبريكي وجيت اول مرة يجي فبالي نجرب حاجة كيف هكا من بعد تفكرت تربية يما رميتهم خممت وش راح ندير في حياتي تفكرت تلفون شعلتو لقيت اسلام عيطلي قريب 100 مرة اصلا هو برك لي بقالي خبيت تلفون ورحت للمقبرة لقيتو ثم قالي علابالي بلي تجي ليماك وعنقني شاف حوايجي قالي حاوزك ؟ درتلو براصي ايه قالي خلاص مليوم انا ندبر راصي داني لدارو وكان يروماركي فيا تبدلت بزاف منكذبوش هو حبني بصح انا قلبي برد روحي موليتش نعرفها بلوكيت علمي فالجامعة كان مستحيل أني نرجع نقرا فهذيك لفترة وكنتنخرج نروح للمقبرة عند ماما ونقعد يوم كامل إسلام كان خايف عليا نكون هبلت ولا كاشما صرالي لكن انا كانت داخلي نار اقرب الناس ليا تخلاو عليا وعلاش مقاتليش ماما بلي منيش بنتهم ؟ ميهمش لاه تحمل بابا مسؤولية اكبر منو ؟ كل يوم يزيد حقدي عليه ونزيد نكرهو اكثر نتمنا يذوق من نفس الكاس لي ذقت انا منها
فات لوقت يجري وانا في دار اسلام نكذب اذا قلت نسيت لكن والفت بابا محوسش علبا وسمعت بلي عاود زواج واسلام علاقتنا كانت مليحة يديني نحوس يحبني يخاف عليا عوضني حنان الاب وعوضلي بزاف حوايج لكن حرقة ماما بقات في قلبي ... وصل الدخول الجامعي وقررت نرجع للجامعة واسلام شجعني رجعت انا نروح نقرا وهو يخدم ومع لعشية يجي يديني ... وبدا لقيل ولقال عليا ( ملي ماتت يماها الطفلة خماجت ، باباها حاوزها لخاطر كانت حامل من اسلام ، هربت من الدار مع صاحبها عليها يماها طلعتلها لاطونصيون .......)
وبزاف بزاف اقوال طعنوني بكلامهم لكن هدرتهم محركتش فيا شي ربي كان عالم بلي صاريلي وعالم ببظروفي
واحد ليوم نستنا في اسلام كي لعادة طول مجاش من بعد عيطلي قالي منال متستناينيش منقدرش نجي روحي فطرونصبور عضيت علا شاربي وقلت فقلبي يا رب وش يوصلني ؟
والوقت متأخر والطريق خالية بصح بديت نمشي ودايرة كيتمان وجماعةتبع فيا ملور محبيتش نحبس لكن حبست الموسيقى نسمع واحد يقول ايا الزين قيمينا حتا لحقوني وداورو بيا الطريق خالية مكانش ليمن نعيط واحد يقول عينيك شابين وواحد شواربك شابين وواحد يرمي في يدو يحاول يمس صدري وانا نقاوم ونبكي واحد جبدني ليه قالي 3 سنين وانا نستنى فاللحظة لي تكوني ليا حتا حبست قدامنا طنوبيل الحمدلله اسلام كان يعيط كي ماريبونديتش جااا تقلق ولا حس بيا تعافر معاهم حاوزهم وعنقني وانا نبكي كي طفلة صغيرة ونقولو علاش خليتني اسلام هو غير يقولي اسمحيلي رحنا الدار انا زادت ساءت حالتي نحس كلش عاكسلي واسلام يحاول يغيرلي جو لكن والله موليتش نحمل سمانة مرحتش للجامعة غير اسلام ضغط عليا مكنتش ناوية نرجع ليها كي رحت بديت نسمع الهدرة كي لعادة راها حامل ... اغتاصبوها جماعة ... رجعت فتاة هوى ... راها خدامة فكاباري راصي قريب يطرطق من كلامهم مخلاوش حاجة مهدروهاش عليا وصلو لي كانو صحاباتي قالولي ربي عطاك الزين ماشي باش تستغليه فهاذ صوالح ولاو ناس كامل يشوفوني خامجة وهذا كامل بسباب بابا لوكان خلاني فدار ميحكوش عليا هك الناس زاطو طمعو في زيني وكل يوم يحبو يوصلوني أكثر واكثر
حكيت لإسلام كي رجعت انا نبكي هو يبكي قالي وش نقدر ندير وانا نقولو غير خلاص اصلا درت فوق طاقتك الناس راهم يقولو معيش عاهرة في دارو حتا حضني قالي تتزوجي بيا ؟ حسيت الدم نشف فيا مقدرتش نعبر قتلو ماشي وقت الزعاقة قالي لالا صح تتزوجي بيا ؟ مصدقتش وش راه يصير يمكن الزهر تفكرني قتلو ايه بلا منخمم اصلا عندي غير هو
قال لعائلتو لي كانو في ولاية ثانية وعارضو تماما زواجنا كيما قالولو مقطوعة من شجرة متدخلش دارنا مجاتنيش غريبة من عندهم صراحة من حقهم يقولو هك هو مشهورين وعندهم مكانة كبيرة وانا وش نكون ؟ لكن هو تحدا الناس كامل وقاللهم بيكم ولا بلا بيكم رايح نتزوجها وصح تزوجني درنا عشا خفيف لمعارفو هو وعقدنا ورجعت مرتو صح العرس مهوش كبير لكن مكانش يهمني لا انا لا هو
فاتت الليلة كأنها خيال صح اول مرة منذ مدة طويلة نفرح هكاك نسيت شوي وحبست قراية ورجعت نخدم معاه في الشركة تاعو عيشني معيشة أميرات شحال كان يحبني دايرني بنتو ومرتو وحبيبتو وكلش في حياتو لي نطلبها تحضر الناس كامل حسدونا على حبنا نسيت وش قاسيت وهدرة الناس خفت شوي ولي زادت فرحتنا كي لقيت روحي حامل ...
طار بلفرحة وزاد دللني اكثر واكثر عشت معاه حلم ماشي حقيقة غير تحواس وضحك
كنت نحمد ربي فدقيقة 100 خطرة لي بعثو ليا
واحد نهار ناض بكري وقعد يلعب بشعري حتا نضت باسني في جبهتي وقالي نحبك نحبك بزاااااف يا منال قتلو ربي يخليك ليا انا بعد نحبك زاد باسلي كرشي وقالي ونحب طارق ( كان عدنا طفل تفاهمنا نسموه طارق )
قتلو وطارق تان يحبك راني بديت نغير هههه قالي عندي اجتماع منطولش ونرجع محبيتوش يروح صراحة مكنتش نحس روحي مليحة هو قالي ارقدي وبركاي مالدلال لازم نروح الشركة راح تضيع وانا راقد معاك هههه زاد باسني وعنقني وخرج نضت درت شغل خفيف وقاعدة نستنا فيه يرجع اليوم عيد ميلادو درتلو تاغت وزينت الدار بورد وشموع وبالونات ولبست ودرت مكياج ونستا فيه على احر من الجمر
وصلت ال8 تاع ليلوهو مجاش نعيطلو ميرفدش عليا يا ربي ويكون بخير برك انا راني نتوهم مهوش مالف يطول هكا ولاه معيطليش عيطت للشركة قاتلي السكريتيرة بلي خرج على 3 قلبي قريب حبس ....
انا هكاك حتا صونا تلفوني الرقم تاعو ... ترددت من بعد ؤفدت قلت ألو قالي ألو مدام هاذي رقم زوجك ؟ لقيناك ماركيك أم ولادي قتلو وين راه اسلام قالي معاك الشرطة اسلام عمل حادث وراه فالمستشفى مذا بيك تجي نكملو الاجراءات اللازمة حسيت الارض تزعزعت تحت رجليا جاتني صورة ماما بين عينيا يا ربي اديني انا وخليه هو مجيت نوصل للصبيطار حسيت الطريق زادت طوالت عمري خرجت ودموعي ويدان وصلت دخلت نشوفو مكانش وش نشوف اصلا مغطي كامل بشاش ابيض والاجهزة موصولين بيه طحت فلرض ونقول يا ربي اديني انا وخليه يعيش ضح منقدرش نوصللكم احساسي جاو دارهم كامل للمستشفى وكانت اول مرة نقابل يماه لي مكانتش مستعرفة بهاذ زواج عنقتني وقاتلي اصبري حالتي كانت تشف
جا الطبيب قاللنا كلش بيد ربي درنا لي علينا لكن الاصابة قوية بزاف في راصو ثم تغاشيت مع لي فطنت لقيت روحي فسرير ويماه معايا شادتلي يدي قلتلها وشخبارو ؟
قاتلي إنا لله وإنا إليه راجعون
وليت ندعي ربي ونقول اديني انا بعد لاه خليتني يا رب
استجمعت قوتي ورحت وين كانو حاطينو ونقولو نوض اسلام ياك قتلي جامي نسمح فيك ليوم عيد ميلادك درتلك لاتارت لي تحبها نوض طارق يستنا فيك ياك تفاهمنا نشرو القش كيف كيف علاش خليتني اسلام والصبيطار كامل يبكي معايا صح مقدرتش نزيد نحمل عندي غير هو وزاد راح
رحنا الدار ودرنا الجنازة ودفناه قدام ماما هو من جيه وماما من جيهوانا متت مرتين وانا على قيد لحياة
يماه قاتلي تعيشي معانا محبيتش حبيت نكمل نعيش في داري شهرين وولدت وانا فصبيطار نتفكر غير فاسلام وماما تمنيت يعيشو معايا هاذ اللحظة لكن القدر كان أقوى منا ولدت وكانت المفاجئة عندي توأم طفلة وطفل الطفل سميتو اسلام طارق والطفلة مريم ماريا على ماما وهكا يبقاو عايشين معايا وفي قلبي ديما جات يماه ومخلاتنيش دقيقة خصوصا بعد معرفت وش قاسيت كانت ليا الام لي تحرمت منها وطارق كان سبحان الله اسلام صغير فاتو 3 سنوات على موتو وكل منتفكرو نبكي شغل مات لبارح نروح للمقبرة نحكي معاه هو وماما ونقوللهم شحال توحشتهم تغبنت وانا صغيرة مزالت حرقة في قلبي مبريتش من حرقة ماما زاد تبعها راجلي
اليوم طارق ومريم كبرو وعمرو عليا الدار ومامات اسلام عايشة معانا صح جوزت معايا بزاف ربي يطول في عمرها ويخليهالي اما بابا راه في دار العجزة رماتو مرتو وانا للأسف محبش يحن قلبي عليه هو سباب دمار حياتي ونبقا حاقدة عليه حتى لليوم لي نتقابلو عند ربي لأنو صح ظلمني
المهم هاذي هي حكايتي لبنات الواحد لازم يصبر مهما يكون ويرضى بقضاء الله والحمد لله على كل حال
ندعي ربي وحدة فيكم متذوق وش ذقت انا وربي يهنيكم كاملين
النهاية
FB : Mahdjoub Ikram omniya
ليست هناك تعليقات:
إرسال تعليق