العودة من جديد
توبة فتاة الليل (الجزء الثالث )
الحلقه 23
عُدي:لينا لاباس؟؟
لينا:امم لاباس...لاباس....وقفت رايحة لتوالات تغسل وجها رجليها مش هازينها شدت فالحيط تلوح الخطوة بالسيف
عُدي:لينا
لينا دورت ليه:انعم
عُدي:اقعد حاب نحكي معاك
لينا:من غير ماتسقسي على حتى حاجة خليني ترونكيل...راحت و خلاتو فاتح فمو..غسلت و حاولت تستجمع قوتها رجعت قعدت مقابلتو...هو يخزر و هي تخزر العين فالعين
عُدي:لينا واش حكاية لي كوشمار لي راكي تشوفيهم...هاذي المرة الثانية لي نشوفك فالحالة هاذي
لينا:قلتلك ماتسقسينيش مانحبش نحكي
عُدي:لا مش بكيفك احكيلي واش مقلقك..واش لي خلاك تهتري و تهدري هداير مش مفهومين...يحكي بصوت حنين حست بلي صادق في خوفو عليها
لينا:مجرد احلام...ماتعمرش راسك بيها....قلي وجيعة عينيك بركاتك؟؟؟
قرب ليها شدلها يدها بقات حايرة في ردة فعلو.._لينا انت اهم من عينيا قولي واشبيك خليني نعاونك....هو يحكي و هي ذايبة في خزرة عينيه لي كلها خوف عليها...اول مرة تحس روحها ضعيفة لدرجة انو تحكي على لي كوشمار لي تشوفهم
لينا:ماضي...ذكريات من الماضي و انت ماتقدرش تعاوني فيهم
عُدي:جرب ماك خاسرة والو...جرب احكيلي ماضي ولا حاضر ممكن نعاونك
لينا جبدت يدها من يدو و بعدت عليه..._عُدي حياتي انا مش كيما حياة اي طفلة...حياتي مافيهاش حاضر فيها ماضي..ماضي و خلاص و احسنلك تبقا بعيد على تفاصيل هالماضي الخايب....خبات الحزن لي على وجها و دورت ليه تبسمت و قالتلو:واش رايك نخرجو حابة ناكل ڨلاص🍦
عُدي:اوكي......خرجو ركبو فالطونوبيل شوية هكذا وصلو لبلاصة شابة بزااااف يبيعو فيها ڨلاص..هبطو شرالها ڨلاص بذوق الفاني و هو فراز...قعدو ياكلو و سارحين كل واحد واش يخمم...هي تخمم في انتقامها وين لحق و خطواتها الجايين لازم تعرف وين تحط رجليها و تعرف كيفاش تتصرف....و هو يخمم في كلامها لي قالتو ماضيها لي زاد هبل باش يعرفو و يعرف حقيقتها....لينا ولا توبة مستعد يدفع عمرو الكل و يعرف المخبي و المستور عليها
عُدي:هيا نوصلك تروح
لينا:لا حابة نمشي شوية الجو هايل...كانت حابة تمشي على رجليها كرهت من كثرة السياقة و قعدة الطونوبيل بالسيف باش قنعتو يروحو يمشيو كانت الساعة 1 تاع الليل ليالي الصيف تنبض بالحياة الناس رايحة جاية..ضحك سهرات شطيح و رديح و غنا..الناس زاهية و السعادة مرسومة على وجوهم.....يمشيو ساكتين واحد فيهم ماتكلم...شافت حاجة مرمية على شط الطريق كأنو عبد خافت يكون جن هههههه..وجها تبدل لونو صفارت و قلبها فزع شدت في يدو تهدر و ترجف
لينا:عُدي خلينا نرجعو
عُدي:مش كنت تقولي حابة نتمشا؟؟
لينا:شوف لهيه كاينة حاجة في لرض.
عُدي:ياخي مخوافة...امشي نشوفو واش الحاجة لي مخوفتك يا مخوافة هههه....وراتلو البلاصة راح يجري و هي غير تعيط عليه يرجع...لحق لقاها مرا مرمية لحمها زرقة باينة كلات طريحة و عندها طعنات بالسكين فكرشها نبضها ضعيف اذا مزربش هزها لسبيطار تموت
عُدي:لينااا...ليناااا...ارواحي هاذي مرا مضروبة لازم نهزوها لسبيطار
لينا:ياااااا الله لا تربح لي عمل فيها هكذا...قعدت تخزر فيها غاضتها بالرغم ماتعرفهاش
عُدي:اقعد هنا معاها نروح نجيب الطونوبيل و نرجع لازم نهزوها لسبيطار.......هو راح يجيب الطونوبيل و هي قعدت تخزر للمرا..وجها مش غريب عليها شايفتها من قبل بصح وين و وقتاش ماعرفتش...قد ماحاولت تتفكر وين شايفتها ماتفكرتش....جا عُدي هز المرا ركبها فالطونوبيل ملور و لينا طلعت ملقدام و طار بيهم طيارة لسبيطار....شافوها الطبة حالتها صعيبة
طبيب:المرا متعرضة لضرب مبرح و عندها نزيف و تمزق فالامعاء لازملها عملية
عُدي:ايه واش راك تستنا مالا ديرلها العملية
طبيب:لازم تدفع دراهم العملية قبل مانبداوها
عُدي تسكر ولا الضو مايشوفوش لوكان ماجاش فالسبيطار كون عطاه طريحة نساه بيها فالدراهم....تخمام حابس المرا باش تموت و هوما يخممو فالمال و كيفاش يعبيو كروشهم..._ديرلها العملية و انا نتكفل بالدرا ...دخلوها لبيت العمليات عُدي راح لرسيبسيون وقع على اوراق و كتبلهم شاك بقيمة العملية...رجع قعد حذا لينا لي مازالت تخمم وين شايفة المرا هاذي....عينيه حومر النار تڨدح فيهم متغشش و جنونو دايرين بيه...منظرو يخوف
لينا:اتهدن مايكون غير الخير
عُدي متغشش : منين يجي الخير مع ناس كيما هاذو..المرا تموت و هو يحوس على الدراهم...حيوان..طحان
لينا:المال عمالهم عينيهم..اذا كان الاخ يقتل خوه على جال دراهم مانستغربش الحالة هاذي
عُدي:واش تقصدي؟؟؟
لينا:والو..والو ماتعمرش راسك
لينا شافت الطبيب خرج قالت لعُدي و راحو عندو يسقسيو على المرا
لينا:دكتور المرا مليحة؟؟
طبيب:اطمنو العملية نجحت ضرك نحطوها في بيت و كي تفطن تقدرو تشوفوها
الحلقه 24
حطو المرا في بيت و قعدو يستناو فيها تفطن...عُدي عيط لجواد يبعث رجال من البوليس باش ياخذو اقوال المرا و يعرفو شكون دار فيها هكا...لينا قاعدة تحاول تتفكر شكون هي المرا و وين شافتها...صونا تليفون لينا جبدت شافت شكون قلبها فزع من بلاصتو
عُدي:واشبيك شكون عيطلك؟؟
لينا:ح..حسا..م
عُدي: هز عليه
لينا:الو..
حسام:لينا علاش ماجيتش اليوم..خوفتني عليك
لينا:ماتخافش عليا عيانة شوية هذا ماكان
حسام:لينا وينك نجي عندك ماقدرتش نفوت ليلة وحدة بلاما نشوفك
لينا:الصباح انا نجي عندك ماتقلقش روحك
حسام:اوكي حبيبي على راحتك...غدوة نكتبو الصداق و بعد يومين تولي مرتي
لينا:اوكي باي.....كوبات عليه خزرت في عُدي و ناضت رايحة
عُدي:استنا وين رايحة؟؟ واش قالك؟؟...كملت تمشي ماردتش عليه...لحقها شدها من يدها و دورها ليه
عُدي:واشبيك نحكي معاك علاه مترديش؟؟
لينا:اطلقني مسيو عُدي
عُدي:كنت لاباس عليك واش صرالك
لينا:واش صرا؟؟فوق ما حياتي مخربطة زدت كملت انت عليها...علاش خيرتني انا من بين الناس كامل...
عُدي:حسام يحبك و انت تقدري تتحكمي فيه
لينا:يحبني؟؟؟مالا هاك معروض غدوة لكتب صداقي عليه......كلمة قالتها خلات الدم جمد في عروقو..صداق؟؟لالالالا مستحيل هاذ الشي يصرا مستحيل يخليه يكتب صداقو عليها ماعرفش علاش كل عضو في جسمو يرفض بقوة انها تتزوج حسام...
عُدي: عاود واش قلت؟؟صداق
لينا:ايه صداق سي حسام حب يكتب الصداق غدوة...علاش يا عُدي علاش انا....دموعها خانوها و هبطو يحرقو على خدها تبكي على زهرها لمعوج بين نهار و ليلة رايحة تولي مرت رتجل تكرهو و تعرف مليح هو علاش حب يتزوج بيها...بدنها لي يغري في كل الرجال هو سبب زواج حسام منها...ماتحبش تمدلو واش يحب بدنها ملكها هي و يبقا ملكها حتى تموت ماكاين حتى راجل يستاهل تسمحلو يملك بدنها....دورت عليه بضهرها و مشات خرجت من السبيطار للجنينة كانت الساعة 4:30 صباح الجو بارد قعدت فوق كرسي نسمة باردة لعبت عليها غمضت عينيها حابة تهرب من الواقع لي تحتمت عليها تكون فيه.
عُدي حس بالذنب جيهتها مهما كانت حقيقتها بنت ليل ولا لا ماتستاهلش لي قاعد يصرا فيها الكوابيس لي تشوفهم ماضيها يكفيها ماكانش لازم عليه يدخلها في قضية صعيبة كيما هاذي....لحقو رجال البوليس خلاهم واقفين قدام البيت يستناو فالمرا تفطن و خرج يحوس عليها لقاها قاعدة متكمشة فوق كرسي نحا الفاست لي لابس و حطهالها فوق كتفها و قعد قدامها فتحت عينيها خزرت فيه و تنهدت
علينا:ماعليش نعرف علاش تكرهني للدرجة هاذي..لدرجة تخليك تعمل معايا هكذا
عُدي:بففف...افهمني لينا انت بنت ليل و مش صعيب عليك تتعامل مع حسام...
سكينة تغرست في قلبها صدمة بغصتها بلعتها #بنت_ليل...هذا واش تسواي عندو افطن يا بنتي حتى اذا ضحك في وجهك مرة ولا زوج يبقا ديما يشوفك بنت الليل لي ماتسواش...ابلع السكينة لي في قلبك و ماتخليش جرحها يعطلك على اهدافك..حياتك كلها جروح و كدمات و صدمات جرح آخر مايقدم مايأخر....تنهدت خزرت فيه نظرتها كانت حادة قاسية قالتلو:عندك حق بنت الليل...عمري ماكنت محتاجة للناس ديما الناس هوما لي يحتاجوني...كيما راك محتاجني انت ضرك
عُدي حس في نبرت صوتها قوة كبيرة تحدي ليه كشخص كرجل..كأنها تقولو راجل كيفك محتاج تعاونو بنت ليل...بنت الليل لي تكرهّا و تشوفها حثالة المجتمع...عُدي الضابط القوي محتاج مساعدة لينا بنت الليل لي ماتسواش.
الحلقه 25
الساعة 8:30 رجعت لدارها تاعبة دوشت نحات تعب ليلة كلبة بنت كلبة...ليلة من أسوء الليالي في حياتها...دخلت لبيتها و تسبطت فوق السرير تفكرت كل حاجة صرات في نهار البارح تفكرت كلامو لي كيف السم لي يقتل بغير مايهتم...غاضتها عمرها بكات حتى عيات و رقدت و كي العادة اطياف الماضي ترجع بيها لسنين فاتو...( يد حنينة تلعبلها على شعرها و يد تمسحلها في دموعها..صوت حنين و دافي ينوض فيها....توبة نوض بنتي هاني جبتلك شوية ماكلة تقوت بيها...نوض عيشك بنتي كول قبل مايرجع عمك...توبة يا نجمة فالسما العالي الليلة مسحبة و نورك خافت بصح مهما طال الزمن و طوالو عليك الليالي تجي ليالي صافية و يرجع نورك يسطع فالسما و تكون نجمة تلالي....توبة..تووووووووبة..)...فطنت تنهج قلبها يخبط..المرا تفكرت وين شافتها و كيفاش تعرفها...ناضت طيارة ركبت الطونوبيل و راحت لحقت لسبيطار طلعت تجري فتحت الباب و دخلت عينيها معمرين بالدموع لقات المرا فطنت...المرا قعدت حايرة فيها...طفلة زينة كي القمر دخلت تبكي زعمة نعرفها لالا عمري ماشفتها واشبيها هاذي باينة تخلطت عليها و غلطت بصح علاش قاعدة تخزر فيا هكذا...اااه يا ربي شكون هاذي تاني
لينا دموعها على خدها شلال قلبها يخبط بدنها يترعد
لينا:يا نجمةفالسما العالي...الليلة مسحبة و نورك خافت.بصح مهما طال الزمن و طوالو عليك الليالي تجي ليالي صافية و يرجع نورك يسطع فالسما و تكون نجمة تلالي
المرا دموعها طاحو تفكرت العزيزة عليها تفكر الطفلة البريئة لي شافتها بعينيها تتعذب و تعاني تفكرت البنية الصغيرة لي فقدت كل شي ضربة وحدة و لي عاشت كلها حقد و كره...._شكون انت؟؟وين سمعت الكلام هذا
لينا:لمياء..لمياء انت لي كنت تقولي الكلام هذا تتفكر
لمياء:توبة؟؟؟لالا توبة بنيتي ماتت ماتت و حرقتلي قلبي عليها
لينا:لمياء تو..توبة هنا...انا توبة....ترمات في حضنها معنقتها و تبكي بحرقة السنين لي ماشافتهاش فيهم....لمياء ماستوعبتش الموضوع و ماقدرتش تصدق بلي توبة مازالها حية الكلام هرب منها ملامح وجها تجمدت غير دموعها قعدو يهبطو على خدها...هزت يديها ضمتها بقوة لصدرها تبوس فيها بلهفة و شوق و حنية...هي هي توبة...توبة لي كلهم حطوها ماتت هاي حية مازالها عايشة....هاي مرا تبارك الله عليها
لمياء:تو..بة...ااااااااه يا بنتي وين كنت المدة هاذي الكل حسبتك مت و تكويت عليك..خليت قلبي عليك محروق
لينا:اااااه يا لمياء شحال توحشت حضنك الدافي الحنين....تعذبت بلا بيك يا الحنينة....قولي شكون عمل فيك هكذا...شكون حب يقتلك؟؟كمال؟؟خديجة؟؟قولي شكون
لمياء:عمك كمال يا بنتي هو لي عمل فيا هكذا..حب يتخلص مني بعد ماعرفت بلي يتاجر بالبنات القاصرات..يخطفهم و في يبيعهم لبيوت الدعارة و الفساد كيما باعك انت
لينا : كمال...كمال الله يلعنك يا حيوان وصلت بيك تاجر ببنات صغار....و الله ماندمك على كل لحظة عيشتهالي قهر و نردلك الصاع صاعين و ناخذ حقي منك و حق كل طفلة تاجرت بيها و بشرفها.....لمياء البوليس واش قلت للبوليس؟؟؟
لمياء:ماقلتلهم والو سمعتهم يحكيو كانو يستناو في واحد اسمو...ااه اسمو الضابط عُدي...يا بنتي لازم نخبرهم كلش على عمك بلاك يقدرو يوقفوه
لينا:لالا ماتقوليلهم والو على كمال...كمال حسابو معايا....و انا لينا مش توبة فهمت عليا لمياء....و ماتعرفني مانعرفك هذا وين تلاقينا كي جيت نطل عليك...لمياء فهمت
لمياء:اصبر عليا بلعقل...لينا؟؟؟
لينا:ماتسقسيني على حتى حاجة ضرك من بعد تفهم كلش...عُدي ممكن يجي في اي وقت.
عندو نص ساعة و القهوة محطوطة قدامو و مازال ماذاقهاش..مقابل جواد يدو على خدو يخزر فيه بصح نظرة عينيه شاردة ماهوش مركز معاه خلاص عقلو مش معاه...عقلو يفكر يفكر يفكر و يفكر و كيما يقولو كل الطرق تؤدي الى روما...كل ما فكر كثر يرجع لنقطة الصفر عند لينا...لينا..لينا...لينا استحوذت على كامل تفكيرو....يتفكر كل لحظة فاتت عليه من اول مرة شافها كيفاش كان يكرها..اول مرة تكلم معاها كيفاش تكبر عليها..اول مرة حس بحاجتها ليه من غير ماتطلب معاونتو كيفاش عنقها و جبدها لصدرو خباها و حسسها بالامان...تفكر النهار لي فوتو معاها شحال كان فرحان و كيفاش نسى الدنيا كامل..تفكر كيفاش قلبو يخونو و دقاتو تقوى كل مايكون قريب ليها...تفكر كل مرة يضعف فيه الراجل القوي الحازم قدام البراءة لي مرسومة في وجها.....
جواد:عُدي واش صاري معاك؟؟من قبيل و انت قاعد تايه..واش صاري معاك يا خويا...فرغلي قلبك هاني معاك نسمعك
تنهد من قلبو و قالو:اااه يا صاحبي و الله ماعرفت واش صاري معايا...كل خطوة نديرها نحس روحي غلطت..عقلي و قلبي كل واحد فيهم يقولي حاجة...و الله حرت واش ندير يا جواد نتبع عقلي ولا نتبع قلبي
جواد:قلتلك رد بالك دير حاجة تندم عليها بصح انت ماسمعتش مني...الطفلة خاطيها و انت دخلتها في لعبة ماهيش قدها
عُدي::افففف...ماعنديش حل خلاف غير هي لي تقدر تلعبها على حسام...الله غالب ماعنديش حل غيرها
جواد:المهم حبيبي ربي يجيب الخير....و اه تفكرت نظن راك مهتم تعرف شكون هي مريم علي..
عُدي:مريم علي..المرا لي ساكنة لينا في دارها؟؟
الحلقه 26
جواد:هي بالذات...اسمع المرا هاذي كانت استاذة جامعية في بداية مشوارها التعليمي...زوجة المحامي محمد حاتم توفاو قبل عشرين سنة و موتهم كان في حادث سير هذا لي لقيناه في الارشيف تاع السبيطار لي خرجو الجثتين منو...و لي عرفناه انو الاهل تاعها خرجو من البلاد بعد موتها و ماقدرناش نعرفو وين راحو...و الدار لي ساكنة فيها لينا سكنو فيها عايلات بزاف من قبل لأنو الدار تابعة لجمعية خيرية و هوما لي تصرفو فيها ...هذا كامل واش عرفنا...يعني رجعنا لنقطة الصفر لا علاقة بين لينا ناصر و مريم علي
عُدي:اووووووف...مستحيل يكون لا علاقة بيناتهم...ابقا ورا القضية هاذي لازم نعرف عليها كلش..لازم
الحلقه 27
هو يحكي مع جواد و تليفونو صونا..البوليسي لي فالسبيطار عيطلو و خبرو بلي المرا فطنت اذا حب يحكي معاها..
عُدي:جواد نوض معايا لسبيطار المرا لي لقيتها البارح فطنت...خلينا نشوفو حكايتها تاني واش
جواد:اوكي هيا نروحو.......خرجو ركبو فالطونوبيل عُدي يسوق و جواد قاعد حذاه شعل الراديو لقاو غنايا...جواد يغني معاها و عُدي يتفكر فيها وقت لي غناتلو صوتها الملائكي نابع من قلب حزين و تعذب بزاف..فيه لحنانة لي فقدتها و الامل لي عاشت معاه فيه الضعف لي كانت فيه و القوة لي رجعت بيها...صوتها عكس حياتها كامل.....حبس قدام السبيطار هبط هو و جواد شاف طونوبيلها حابسة قدام سبيطار معنتها
راهي هنا جات تشوف المرا...دخل طيارة قلبو ملهوف على شوفتها..دقدق الباب و دخل لقاها قاعدة عينيها منفخين باينة كانت تبكي...شعرها مخبل طايح على وجها لابسة روبة قصيرة جهد ما مغطية فخاضها خزر فيها من فوق لتحت..تنهد و في قلبو يقول واش تستنا من بنت ليل غير تعري و تفضح لحمها للذيابا لي كاينين..لهفتو لشوفتها راحت فاللحظة لي شافها لحمها كامل عريانة..
جواد:مدام لمياء؟؟هكا مانيش غالط..
لمياء:ايه سي جواد
جواد:البارح تعرضتي للضرب و الاعتداء بالسلاح الابيض...شكون عمل فيك هذا الكل
لمياء:ماعلاباليش يا ولدي ماعرفتهمش
عُدي:احكيلنا واش صرا بالضبط...وين كنت و كيفاش صرالك هكذا
لمياء خزرت في لينا تسأل فيها بعينيها اذا تخبرهم بالحقيقة ولا لالا...هزتلها راسها بلالا ماتقول حتى حاجة...عُدي لاحظ الخزرات لي بيناتهم دخلو الشك..عاود سقساها واش صرا
لمياء:كنت فالسوق نقضي و كي عدت راجعة للدار حبو يسرقولي دراهمي و كي قاومتهم ضربوني و طعنوني بالسكين
عُدي دور خزر في لينا.._متأكدة مدام من لي قلتيه...لينا تفرفشت و دورت وجها عليه ماقدرتش تواجه خزرت عينيه
لمياء:ايه هذا لي صرا
عُدي:مليح...ااه لينا هنا تعرفتي عليها مدام
لمياء:يكثر خيرها جات طلت عليا....لينا
جواد:القضية راح تتسجل على انها سرقة و محاولة قتل...حنا نديرو لي علينا باش نلقاو لي عمل فيك هكذا..ربي يجيب الشفا مدام...عُدي هيا نروحو
لينا:مسيو عُدي اذا ماكانش مشكل نقدر نستقبل المدام لمياء في داري حتى ترتاح و ترجعلها صحتها
عُدي: امم...اذا هي حبت حنا ماعندناش مشكل...المهم وقت لي يكون الجديد في قضيتها نلقاوها موجودة
عُدي خرج من البيت و عقلو مازال يخمم فلي شافو الداخل..كاين حاجة بين لينا و لمياء
جواد:لينا عندها قلب حنين باش تخلي مرا ماتعرفهاش في دارها
عُدي:ههههههههه لينا تعرف لمياء..و انا متأكد
جواد:O.o واشنو
عُدي:كيما سمعت...و حكاية السرقة مفبركة ..لمياء كذبت علينا يا جواد
جواد:اصبر عليا مانيش فاهم عليك...علاش لمياء تكذب علينا؟؟
عُدي:لينا....وقت لي سقسيت لمياء واش صرا خزرت في لينا..و لينا اشرتلها براسها باش ماتحكيش..يعني الحكاية لي قالتها لمياء كذب
جواد:و هذا يعني لينا تعرف لمياء من قبل و تعرف كيفاش تضربت...معنتها من لمياء نقدرو نعرفو شكون هي توبة
عُدي:صحييييت هاك فهمتني و ضرك لازم تعرفلي كلش على لمياء كل حاجة ماتخلي والو
جواد:ااااااه يا صاحبي واش حشرنا في الطفلة هاذي باش نقعدو ننبشو في ماضيها و نتبعو الناس لي تعرفهم
عُدي:ماعليش صاحبي في خاطري كمل معايا للخر...اوكي
جواد:اوكي على خاطرك كلش يهون يا خويا العزيز...بصح بشرط مهما كان واش نلقاو عليها ماعادش نتدخلو في حياتها
عُدي:ههه ساهلة اعرفلي عليها كلش و كل واحد في طريقو هي ماتعرفنا و حنا مانعرفوها.
بعد ماخرجو الضباط من بيت لمياء قعدت معاها لينا شوية...هدرت مع الطبيب لي طمنها على حالة المريضة و خبرها بلي بعد يومين تقدر تخرجها من السبيطار...بصح لمياء كانت خايفة يعرف كمال بلي مازالت عايشة و يرجع يبعث لي يقتلها..حرّصت على لينا تخرجها اليوم قبل غدوة..و لينا مالقات مادير غير تخرجها و تخدم فرملية تلتها بيها حتى ترتاح...
رجعت للدار مع لمياء لقات منى و نجية مقلقين عليها و يرعشو من الخوف عيطولها الف مرة و ماردتش عليهم..منى من كثرة الخوف رجعلها زعاف و ضيقة...يستناو فيها على نار بعد ماخرجت من الدار فالحالة هذيك
نجية:اففف...الحمد لله على سلامتك يا بنتي علاش تخلع فينا هكذا علاش
لينا:ماتقلقوش عليا..مايصرالي والو
منى هنا طرطقت و خرجت كامل زعافها في لينا لي قعدت داهشة و ماقدرتش ترد عليها بحتى كلمة
منى:ههه..مانقلقوش عليك؟؟؟شفت روحك وقت لي خرجت ولا مشفتش..اه قولي تراش شفت قداه من مرة عيطنالك ولا ماشفتش..جاوبني لينا....ماعندكش واش تقول؟؟مالا مانقلقوش عليك؟؟ههههه سمعتها نجية قالتلك ماتقلقش عليا...ايه لينا ناصر تعرف واش راهي دير و ماهيش محتاجة لي يخاف ولا يتقلق عليها...لا انت ولا انا نعنيولها....ايه ماعندناش حق نتقلقو عليها خاطر حنا والو في حياتها..نجية الخديمة و منى الطفلة لي شافقة عليها و معيشتها معاها..مش هكذا لينا؟؟هههه سامحنا يا لالة تفقعت مرارتنا من الخوف عليك
الحلقه 28
لينا:منى ان..
منى:منى خلاص مش وقت تعاتبيني فيه...هذا لي كنت راح تقوليه؟؟صح ولا راني غالطة...افهمها حتى اذا ماكناش نعنيولك انت تعنيلنا بزاف و نخافو عليك و نتقلقو على خاطر مشاعرنا نابعة من القلب و حنا ماعندناش القدرة باش نتحكمو في مشاعرنا و في قلوبنا......خلاص منى فقدت السيطرة على اعصابها دموعها هبطو على خدها جات لينا باش تحكي معاها و تهدنها بعدتها عليها و دخلت لبيتها و خبطت الباب قريب كسرتها و خلات لينا واقفة ماعرفاش واش لازم دير..
نجية:خافت عليك بزاف..مهما قالت ماتلومهاش هذا كامل على خاطر تحبك..انت عايلتها لي قعدتلها و ماتحبش تخسرك..منى تحتاجك في حياتها انت يماها و انت باباها و انت ختها و انت خوها و انت كل حاجة مليحة في حياتها...ماتخليهاش بيها
الحلقه 29
لينا:و انتوما عايلتي لي بقاتلي يا خالتي و نحبكم ديما مرتاحين و مايخصكم والو
نجية:علابالي يا بنتي بصح منى محتاجتك تكون قريبة ليها....ماعليش خليها وحدها شوية...(دورت خزرت في لمياء)...ماقلتليش جايبة ضياف معاك
لينا:امم☺☺هاذي لمياء هي لي رباتني..حب ربي و لقيتها بصح كيما راكي تشوفي راهي مريضة و لازم نتلهاو بيها..
نجية:ماتخممش راهي في عينيا
لينا:وجدلها البيت وين تقعد و تهلا فيها مليح..(لحمها شوكت و وجها تبدل)
نجية:ال..بيت...تحكي على..البيت المغلوقة؟؟
لينا بلعت ريقها و تنهدت و قالتلها:ايه البيت المغلوقة افتحيها نظفيها و تكفلي بكلش خالتي نجية......راحت لبيتها و غلقت الباب و خلات نجية مع لمياء....من نهار سكنت فالدار هاذي اول مرة يتفتح فيها باب البيت لي تغلقت و غلقت على نص ماضيها معاها غلقتها و قررت ماتفتحهاش حتى ترجع حقها من لي ظلمها و سرقلها سعادتها...البيت مازالت كيما كانت السرير..الخزانة..التاقة..الكوافيز..الثرية..الحوايج قدم مخبيين فالخزانة و اوراق و ملفات لي فوق السرير و لي فوق الكوافيز و لي مرمي على لرض...تنهدت نجية و هي تفتح فالتاقة و تشوف نور الشمس داخل للبيت الحزينة الباردة لي كلاتها الغبرة ولا حد سأل عليها ولا خمم يفتحها.....
لينا كانت في بيتها و تفكرت وعدها لنفسها بلي البيت تبقا كيما راهي و مايتمس منها والو حتى ترجع حقها...ناضت خرجت من بيتها لقات لمياء فالصالون و نجية فتحت باب البيت..راحت تجري شافت الباب مفتوح و نور الشمس مضوي البيت
لينا:لا خالتي نجية ماتمس حتى حاجة..
نجية:مش قلت نضفها وين تقعد لمياء؟؟
لينا:ارجع اغلقها كيما كانت..لمياء تقعد في بيتي و انا نقعد مع منى ولا فالصالون...المهم البيت ترجع تتغلق
نجية:كيما تحبي يا بنتي
لينا:تعيش خالتي نجية عاون لمياء باش تدخل للبيت تاعي حتى تلحق الفرملية..و انا نروح نحكي مع منى
نجية:ماعليش يا بنتي....سايسها و ماتقلقش منها
لينا:امم اتهنا......راحت لبيت منى رجل لقدام و عشرة لور..وقفت قدام الباب دقدقت و دخلت..دورت منى وجها و مسحت دموعها و قعدت مقابلتها بالضهر
لينا:منى تعرف بلي الكلام لي قلتيه مش صحيح انت اختي و لي يضرك يضرني و لي يفرحك يفرحني..شكون بقالي من والديا خلافك...دور اخزر فيا منى ماتقابلنيش بالضهر
منى:اذا معتبرتني ختك علاش تخبي عليا واش يقلقك...علابالي كاينة حاجة كبيرة راك مخبيتها عليا...مسيو عُدي و لابوليس و سي حسام و المرا لي دخلت معاك من قبيل....(دورت خزرت فيها و عينيها معمرين دموع)..لينا انت ختي فرغلي قلبك بلاك نقدر نعاونك..هاني مشيت معاك حتى للبار من غير مانعرف علاش ولينا بنات ليل و الناس يحرقو فينا بالكلام...بصح راني نشوف فيك كل يوم تغرق...قاعدة نشوف و كل مانحاول نعاونك ترفضي...علاش مش كنت تقول بلي انا ختك و لي يضرني يضرك..حتى انت ختي و لي يضرك يضرني
لينا:و انا مانحملش تتضر ختي بسبتي انا.. حياتي المحطمة تكفي مالازمش تتحطم حياتك انت تاني
منى مسحت دموعها و نظرة حادة بين عينيها..._يا تحكيلي و ماتخبي عليا والو يا انسا بلي تعرفني....لينا قعدت حايرة يا تقولها و دخلها معاها في لعبة تحطملها حياتها يا ماتقولهاش و تخسرها..منى ناضت جبدت فاليزة و بدات تلم في حوايجها
لينا:منى براكانا من لعب الذراري وين رايحة(تمنى تحط فالفاليزة و لينا تنحي منها ههه)
منى:مادخلك فيا انت قررتي ماتحكيليش و بهذا قطعتي العلاقة لي بيناتنا.....غلقت الفاليزة لبست حوايجها و خارجة حتى حكمتها لينا من يدها و حبستها
لينا:منى ماتهبلنيش اقعد راكحة خيرلك كيفاش عشرة سنين ترميها؟؟؟احبس ضرك نحكيلك و تفكري بلي انت لي حبيتي تعرفي...اقعدي و هاتي فاليزة من يدك.......منى قعدت و لينا تفرغ فلحوايج من الفاليزة..بدات تحكيلها واش صرا من طأطأ للسلام عليكم...منى تسمع و مش مصدقة واش صاري و هي لاخبر..شهقت فرد مرة و حطت يدها على صدرها
منى:يااااا خاااااااه نندب...انا وين كنت كي صرا هذا الكل...علاش ماقلتليش كنت قادرة نعاونك علاش؟؟؟؟
لينا:ماحبيتش نحيرك عليا كثر....المهم ضرك لازم نلقا حل نبعد بيه حسام حتى نعرف وين و وقتاش تدخل المخذرات و نقول عليها للبوليس و نتهنا
منى:شوف نخذروه و نختطفوه و نعذبوه حتى يقولنا وين تلحق و لوين تتوزع و نسلموه للبوليس...هههه(حسبت روحها في فيلم اكشن و تضحك كيما الأشرار هههه)
لينا:O.o منى حابين نحكمو المجرم ماشي نتحولو لمجرمين...فهمتي حبوبتي
منى:احم...تأثرت شوية بالتخيلات تاعي....قولي و ضرك لمياء كيفاش نديرولها زعمة عمك مايلقاهاش هنا؟؟
لينا:ماتخممش مستحيل يلقاها...كمال مايعرف والو على الدار هاذي و حتى اذا تقابلنا وجه لوجه مستحيل يعرفني...و كي فكرتني لمياء تقعد في بيتي و انا نقعد معاك اذا ماعندكش مشكل
منى:تقعد في بيتي؟؟هاذي غير انسايها حنونة
لينا:اوكي..ماعليش نقعد فالصالون حتى نلقا حل منى:ههههههههههه....يا بهلولة الدار دارك وين تحبي تقعدي اقعدي..اذا تحبي تقعدي هنا و انا نروح للصالون ماعنديش مشكل...هههه اول مرة نشوف مول الدار يستأذن باش يقعد في بيت من بيوت الدار....امشي شوف لمياء و انا نروح نعاون نجية
لينا:اوكي
الحلقه 30
راحت قعدت مع لمياء يحكيو و الباب دقدقت راحت فتحتها لقات الفرملية لحقت..دخلتها و جات تغلق الباب بصح حبست في بلاصتها و جمدت كي شافت عُدي واقف بعيد مقابلها..الحطة لي كان فيها خلاتها تترعد و الدوخة تلعب عليها..لابس كوستيم كحل و شوميز بيضة كرافات روج..شعرو كيفاش ممشوط و لحيتو خفيييفة عينيه يلمعو من بعيد ريحة برفانتو واصلة لعندها سكرتها و دوختها...حط ديه في جيوب سروالو و خزر فيها و جا عندها كل خطوة يخطيها قلبها يضرب الف ضربة و النفس يتقطع فيها(ايييه بقلاوة يا جدكم بقلاوة هههه)..خلاص هنا عرفت بلي عُدي عندو تأثير كبير عليها و بلي خسرت و طاحت فالفخ...فخ الحب من طرف واحد...عرفت مشاعرها و تأكدت بلي لي في قلبها حب كبير لضابط البوليس..و في قرارة نفسها تعرف بلي هذا الحب ماكاتبلوش يشوف النور لأنو من جهة وحدة...و لي تحبو يكرها و قاعد يستغل فيها...
عُدي:ناوية تطول و انت تخزر فيا هكذا؟؟عييت من الوقوف عند بابك و انت تخزر فيا..ماتعرضنيش على قهوة؟؟
تفرفشت وجها صفار و خضار و حمار حست السخانة طلعتلها للمية...._اتفضل يا ضابط
عُدي:مازلت تخزر فيا؟؟؟اذا تحب نجيبلك فوطو تاعي اتفرج معاه ماعنديش الوقت الكافي باش نقعد معاك و انت تخزر فيا
لينا:ادخل و اسكت...ماكنتش نخزر فيك عينيا وجعوني بقيت مركزة مع حاجة اخرى
عُدي:امم صدقتك...اذا بدلت رايك قولي نجيبلك فوطو(يحكي و يضحك في ضحكة خفيفة ذوبتها و خلات قلبها يشطح من الفرحة ههههه)
لينا:يا ضابط اتفضل ادخل ولا ارجع منين جيت عندي شغالات بزاف.....دخل هو الاول و هي وراه غلقت الباب و تنهدت حطت يدها على قلبها لي مازال يخبط...ااااه يا قلبي اهدا و نظم ضرباتك...ههه علاش خنتني يا قلبي و حبيت لي يكرهني..تعذبني و تعذب في روحك برك...عُدي مستحيل يحبني ولا يحس بيك يا قلب...فلخر انا بنت ليل في عينيه...اتعلم تخبي ولا تنسا هذا الحب عمرو مايكون من نصيبك.
وقت لي خرج من السبيطار هو و جواد رجع للدار مقلق و كاره الدنيا حتى انو ماهدرش مع يماه..دخل ديراكت للبيت و غلقها تسبط فوق السرير و كل مايغمض عينيه يشوفها هي....حس روحو مخنوق و قلبو يوجع فيه....دقدق الباب ناض فتحو لقاها يماه رجع فوق السرير و قعد...قعدت قدامو و حطت يدها على كتفو
فاطمة:غير الخير يا وليدي واشبيك؟؟عندك مدة و انت ماكش مليح
عُدي:مانيش عارف يا يما واش صرالي...كنت حاط في بالي خدمتي هي كلش و على جالها درت حاجة مش مليحة و غلطت في حق انسان
فاطمة:اطلب منو السماح و ماتزيدش تغلط في حقو
عُدي:على جال بلادي غلطت معاها...غير هي لي تقدر تخدم خدمة كيما هاذي....يا هي يا الاف من الناس الابرياء يموتو....قولي فطومة واش لازم ندير؟؟؟
جبدتو لصدرها عنقتو..._نعرف وليدي راجل فحل و عندي ثقة كبيرة فيك..تقدر تلقا حل يكون فيه مصلحة للجميع... هي مايصرالها والو و الناس الابرياء تاني ما يصرالهم والو...اتوكل على ربي و هو مايخيبكش
عُدي:ان شاء الله يا يما...انت دعيلي ربي يوفقني
فاطمة:نوض ضرك عندك ماتخدملي..
عُدي:الغالي يطلب الرخيس...قولي واش تحتاج؟؟
فاطمة:شفت البنية هذيك لي نهار جات عند ميادة...طفلة كي العسل
عُدي:واش من طفلة؟؟ احبس احبس اذا حابة تزوجني انساها الفكرة هاذي و نحيها من راسك
فاطمة:شكون هدر على الزواج؟؟ روح جيبها تتعشا معنا...و الله حبيتها و قعدت تغلي في قلبي
عُدي:.صحَ واش من طفلة
فاطمة:هذيك لي تخدم الديكور....اه اسمها نينا ولا لينا
عُدي فتح فمو و قعد داهش هههه حتى يماه تخمم فيها كيما يخمم فيها هو..هاذي مصادفة ولا مكتوب ربي....
فاطمة:علاش تضحك يا طفل...نوض بدل حوايجك و روح جيبها و ماتجيش بلا بيها
عُدي:ههه اوكي فطومة ضرك نوض....يماه خرجت و هو ناض دوش عدل شعرو نقص في لحيتو...لبس كوستيم الله الله عليه تقول رايح يجيب عروستو..غرق روحو فالبارفان و خرج يمشي و يدندن لحق قدام دارها حبس الطونوبيل و نزل شافها تحكي مع مرا فالباب...وقت لي هزت راسها و خزرت فيه حس روحو ملك الدنيا....راح جيهتها وقف قدامها حب يعنقها و يخليها في حضنو..يبوسها و يذوق بنة شفايفها لي كل مايشوفهم يتشهاهم
الحلقه 31
دخل لدارها و هي وراه لقاتو نجية و منى...كامل قعدو بخزرو في بعضهم عُدي يخزر في نجبة و منى....نجية و منى خزرت عينيهم حوالت بين لينا و عُدي....لينا تولهتلهم بلي تلبكو و ماعرفوش واش يقولو
لينا:احم...خالتي نجية..منى هذا الضابط عُدي....يا ضابط هاذي منى و هاذي خالتي نجية
عُدي تبسم.._متشرفين
نجية:الشرف لينا يا وليدي...اتفضل للصالون...نجية مشات معاه للصالون و منى حكمت لينا..._يا ولدي و هذا واش جابو هنا؟؟
لينا:و انا وين علابالي واش جابو هنا فتحت الباب لقيتو....
منى:ايه هاذي فهمتها..بصح انت علاش لونك مخطوف و ترجفي هكذا؟؟؟قولي تراش ياك وعدتني ماتخبي عليا والو
لينا:مننننى...
نجية تعيطلهم..._لينا ارواح اقعد مع الضيف تاعك عيب تخليه وحدو
لينا:جاية خالتي نجية...منى من بعد و نحكيو.....راحت لصالون لقاتو قاعد يخزر من جيهة لجيهة و التبسيمة ماخطاتش وجهو..قعدت مقابلتو و قلبها مازال يخبط و مشاعرها مازالت مخربطة
نجية:اقعد مع ضيفك نجيبلكم قهيوة
لينا:اوكي خالتي نجية قول لمنى تعاونك......نجية راحت و السكوت خيم عليهم مدة..كل واحد فيهم يخزر في لاخر لا كلام ولا سلام...حتى قررت تفتح باب الحوار معاه
لينا:يا ضابط علاش جيت حتى لداري
عُدي:دارك شابة انت لي خدمتيها ☺☺
لينا:حسام و راني نجيبلك في اخبارو و قريب تعرف كلش عليه..انت تتهنا و انا نتهنا
عُدي:نجية و منى واش يقربولك؟؟
لينا:مسيو عُدي وين حاب توصل بأسئلتك؟؟
عُدي: والو...لمياء هنا؟؟ ماكانش لازم تخرج من السبيطار اليوم..علاش خرجتها؟؟؟
لينا تفرفشت و بدات تمهمه فالهدرة..._لمياء هي...هي...لمياء قالت بلي ماتحبش سبيطارات و تكره ريحتهم و على هاذي خرجتها و جبتلها فرملية تقوم بيها
عُدي:مليح....جات نجية بعد ما وجدتلهم القهوة و القاطو قعدت معاهم تحكي و تضحك كي عادتها بدلت الجو المشحون لي كان و خلاتهم يضحكو بالصوت....عُدي اول مرة يشوف لينا تضحك من قلبها..زينة تهبل و ملامحها بريئة..
عُدي:لينا يما عرضتك تتعشا و على هاذي انا جيت...نوض البس خليني نوصلك
لينا:O.o..يماك عرضتني؟؟؟؟مانق...
نجية:ضرك تلبس و تروح معاك...ايه خليها تبدل شوية جو....حكمتها من يدها و كركرتها معاها لبيتها..
لينا: علاش قلتلو هكذا ماكنتش ناوية نروح معاه؟؟؟؟
نجية:البس حاجة مليحة و خلي شعرك مطلوق...رايحة عند الناس اضحك معاهم و ماتقعدش تايهة....انا نخرج نقعد معاه و انت ازربي وجدي روحك....نجية رجعت للصالون عند عُدي و لينا تنهدت فتحت الخزانة قلبتها على حاجة تلبسها و ماعجبتها حتى حاجة كلهم قصار و مفضوحين و هي ماحبتش تلبس قدام يمات عُدي حاجة مفضوحة....راحت لبيت منى فتحت خزانتها و بدات تحوس على حاجة تلبسها...دخلت منى لقات البيت ماتشبه لوالو قشها كامل مبزع و لينا تجبد و ترمي
منى:اااااااااع...اااه حوايجي علاش ترمي فيهم...تلم في حوايجها و تندب
لينا:يمات عُدي عرضتني و مالقيتش واش نلبس حوايجي كامل عرياني
منى:يمات عُدي؟؟ههههههه حتى حوايجي عريانين
لينا:ااااا. واش نلبس
منى:اصبر تفكرت عندي روبة ماهيش مفضوحة بزاف..اصبر نجبدها....جبدتلها روبة عند الركبة ستيل باربي ضهرها بالدونتال عريانة روز تلمع....ها واش رايك فيها؟؟
لينا:منى مانيش معروضة لعرس
منى:هاذي لي كاينة يا تلبسها يا تروح بحوايجك المفضوحين
لينا:اووووووف هات جدها نلبسها ماعنديش حل خلاف.......لبستها و خلات شعرها مطلوق باش تغطي ضهرها دارت ماكياج خفيف كي عادتها و روج يلمع بينتلها شفايفها...لبست طالون..و رجعت كيف الاميرات حتى باربي و ماتسواش قدامها.......راحت عندهم للصالون كي شافها شرق و عينيه خرجو...هي حشمت و قلبها بدا يخبط هبطت راسها للرض باش مايفيقش بمشاعرها..
نجية:بسم الله عليك يا وليدي هاك اشرب الما
عُدي:اححح..اححح...ماعليش راني بخير...نروحو لينا؟؟
لينا:اوكي نروحو
الحلقه 33
9:00 تاع الليل لحقت للبار لقات حسام قاعد يستنا فيها كي الكلب الهايج قعدت قدامو و تبسمت تبسيمة صفرة من فوق القلب...تشوف فيه قاعد مقابلها و يتفرج فيها تنهدت و دورت لحسام تحكي معاه و تحاول تجبدو بالحديث حتى تعرف كلش...مابقاش بزاف و تدخل المخذرات و لازم تعرف لوين تتوزع
حسام:علاش ماجيتش البارح...وين كنت
لينا:البارح كانت ليلة مهبولة قريب مت فيها....تفاهمت مع جماعة نلحقلهم مخذرات و ماوصلتهمش...قريب قتلوني لازم نوجدلهم كمية كبيرة في يومين و لا يقتلوني...راني حاصلة يا حسام....(عُدي يسمع و متعجب من الأفكار لي تجيب فيهم باش طيح حسام)
حسام المعمي على عينيه صدقها و تأثر بواش قالتلو و كان مستعد يعاونها..._شحال تحتاج...لينا خلي الكلام هذا بيناتنا..كاينة كمية كبيرة تدخل بعد يومين نقدر نعاونك
لينا:يااااا حسام تحكي صح؟ لوين تلحق وقتاش نقدر نديها
حسام:هههه بعقلك لينا تلحق بعد يومين و انا نجيبهالك بيدي...ماتقلقش روحك....مانيش حاب ندخل روحي في امور خدمتك على خاطر عندي ثقة فيك بلي تقدر تعمل اي حاجة في راسك بلاما تحتاجني
لينا:يعطيك الصحة حسام فرحتني....قربت ليه و باستو من خدو...السيد شعلت فيه النار حط يديه ورا ضهرها و قربها ليه حتى تخلطت انفاسهم..حط شفايفو على شفايفها باسها....قلبها دار و قريب تقيات فيه...سيطرت على روحها بالسيف...تمثل فالفرحة بصح داخلها تندب في ايامها لي خلات كلب كيما هذا يبوسها......عُدي يتفرج من بعيد قاعد على اعصابو و هو يشوف فيها بين يديه شفايفها لي تمنا يبوسهم و يتذوق طعمهم...سبقو ليهم حسام و هاو قدام عينيه يبوس فيها و هي ماقاومتوش...نار ڨدات في قلبو تغشش و قريب طرطق...الجنون دارو بيه الدنيا ظلامت في وجهو...مافهمش علاش قلبو وجعو من شوفتها تبوس في حسام...علاش تأثرت بيها يا عُدي افطن يا ولدي ماهي غير بنت ليل و ماساهل عليها غير تبوس و تترما في احضان الرجال...علاش توجعت ...قلبك يا عُدي ماعادش ينبض..عاد ينادي باسمها..حبيتها يا عُدي..عشقت فيها ماعندك ماتنكر اعترف بالحقيقة لنفسك انت حبيت بنت الليل لي مفروض مايتهزلك منها شعرة...عشقتها يا عُدي عشقتهاااااااااا.......ناض خرج من البار الجن لحمر داير بيه...تقيسو يطرطق فيك...ولا قنبلة موقوتة غير تمسها تنفجر...هذا كلو تأثير بنت الليل عليه كيما يسميها هو......من جيهة اخرى لينا كانت تعاني الامرين مع حسام السهرية كامل و هو لاصق في جنبها و يحاول يتقرب منها...عافت روحها و تمنات تموت في لحظتها...بصح مابقاش قد لي فات بعد ما وصلت هنا مستحيل ترجع مهما كان الامر....خاصة بعد ماقدرت تحط جهاز تعقب فتليفون حسام....و قدرت ترشي واحد من رجالو المقربين باش يخبرها بكامل التفاصيل على العملية...يعني حتى هي كانت تقوم بخدمتها على اكمل وجه و ماكانتش متقاعصة فيها....بقالها تستنا الوقت المناسب برك.
...................بعد يومين....................
جواد..عُدي..لينا..منى الكل قاعد على اعصابو كامل وجوهم مقلوبة كل واحد يدعي يفوت النهار هذا على خير و يحكمو حسام بالجرم المشهود....اليوم من المفروض عرس لينا و حسام...لينا وجدت روحها هي و منى و خرجو من الدار تستنا في حسام وقتاش يعيطلها باش يكتبو العقود...منى على اعصابها تقول في جنازة..و صحيح هاذي جنازة لينا
لينا:عملت لي قلتلك عليه؟؟؟
منى:كل حاجة بالتفصيل كيما قلت عليها بالضبط.....تليفون لينا صونا هزت لقاتو عُدي
لينا:الو
عُدي:لينا واش قاعدة تعمل...رد بالك توقع و تولي في ذمة راجل مجرم مصيرو الحبس
لينا:فات الوقت عُدي...انت واثق مني بلي نقدر نطيح حسام...خلي ثيقتك بيا كبيرة و انا مستحيل نخيب ثيقتك.....(دموعها خانوها و بحة البكا لي في صوتها لحقتو و ذبحت قلبو بسكين)...تقدر تفوت للدار خليتلك امانة مع نجية تثبت بلي حسام يتاجر بالمخذرات و توصلك ليه و للبلاصة لي توصل ليها الشحنة... انا لازم نغلق التليفون...حسام قاعد يعيط
عُدي:لينا لا ماتعملش هكذا...نقدرو نحكموه بغير ماتوقع على عقد الزواج معاه....لينا..الو الو......الله يلعنك يا حسام.......راح طيارة لدارها خذا الامانة لي خلاتلو مع نجية...تسجيلات صوتية لحسام و هو يحكي على المخذرات..و جهاز GPS بيه يقدر يحدد تليفون حسام و بالتالي يقدر يلقاه....بعد ما شافهم عرف بلي لينا وحدة ذكية و مستحيل يصرالها حاجة خايبة...كان عندو امل كبير انها تكون تمثل عليه باش يكمل يوثق فيها لحتى آخر نفس...
تبعو الجزء الرابع (و الاخير ) باش تعرفو باقي الاحداث
ليست هناك تعليقات:
إرسال تعليق