التخلص من رائحة العرق بخطوات بسيطة

بونسواغ حبوباتي موضوع اليوم هو خلطة التخلص من رائحة العرق و تقليل من التعرق الزائد . الخلطة بسيطة غير مكلفة و سهلة عبارة عن ستيك طبيعي المكونات في الصورة و هي 1_ الشب غبرة تشريه من عند لي يبيعوا التوابل او الأعشاب تشري قيس 30 دج تكفي

2_ ماء الورد قرعة شريتها ب 115 دج من عند الكوسميتيك مليحة لكلش انا ندير بيها فوجهي تمد إنعاش هااااايل و تاني نديرها فجسمي مور الدوش

3_ طالك أو بودرة الأطفال هادا مليح فكلش نستعملو بعد الدوش نرش بيه جسمي و يخلي ريحة روعة تاع bb خاصة للمنطقة الحساسة بعد دخول الحمام اكو فهمتو وش نقصد

4_ علبة فارغة انا خيرت تاع nivea فرغت محبيتش نرميها درت فيها هاد الخلطة

أولا لمن تعاني من الإسوداد تحت الابطين أحكمي برج قارص امسحي بيه تحت يديك و رشي شوية نشاء ( مايزينة ) و دلكيهم شوية مع الوقت يروح الاسوداد . هادي ديريها كي تكوني فالدار

ثانيا كي تخرجي من الدار أو حتي فالبيت تحبي تنحي ريحة العرق خاصة فهاد السخانة خلطي 2 ملاعق شب + 2 ملاعق بودرة الاطفال + شوية ماء ورد تتحصلي على عجينة غير متماسكة خليها و دايمن قبل متخرجي ديري شوية تحت الابط تاعك و لي تعرق ف رجليها ادير بين صباعتيها تاني و هكا كي تخرجي مام تعرقي تمتم ينشف لعرق حوايجك ميفوحوش و نتي تقعد فيك ريحة شابة و مع الوقت تنقص كمية العرق

و ثاني تقدري تشري l'eau de Colongue قبل ما تخرجي تمسحي بيها و ترشي هذاك الشب غبرة انا نديرها قبل ما نخرج ريحة تهبل و ينقص التعرق درتلكم لتحت لي نديرهم انا باش تعرفو و كاين بزاااف كيما تحبوو

نصيحة : ختي ادا راكي فالدار مديريش دايمن هاد الخلطة بسكو التعرق مليح هكا يخرج الجسم السموم لي فيه اغسلي بالماء و الصابون و لي عندها مشكل مع الرائحة ساعة علي ساعة ( ترش) ماء الورد فوجها و تحت الايدي و غيرها من مناطق التعرق و ننصحكم meilleure déodorant هي dove concombre هاااايلة ولا nivea هي لي راني نديرها دوكا