سلااام عليكم لبنات اليوم جبتلكم موضوع مهم تحتاجو كل واحدة مقبلة على زواج وحتى العازبات بيانسوور توجووغ قعدو معايا في لخط هههه
هو كيفاش تتعامل المراة او الزوجة الجديدة كي تكون وسط عايلة فيها العجوز والشيخ والسلاف واالسلفات ونسا السلاف
الووووغ نبداو يا حنوناتي
.لازم تعرفو بلي دوكا خلاص تزوجتو والدلال والتفنيين لي موالفين بيه خلاص تنساوه
الصباح نوصيكم ما تولفولهمش تنوضو بكري .نورمال نوضو 08:00 او 08:30 وكي تنوضو نظفو شمبرتكم مليح بدلو غطاء السرير كل يوم .يا الكشرودات علابالي راكم رحتو نقلتو داركم كامل وخليتو والديكم مساكن نحيتولهم الجلد علابالي ديتو بزاف صوالح من بيناتهم لي كوفرولي ولي درا وووووو.... المهم كل يوم بدلو لي كوفرولي .ونوصيك كل يوم لبسة وحطة الله الله خاصة الايام الاولى جامي يشوفكم واحد وانتوما مهملين رواحكم ماشي تنساي روحك وتنوضي وتحبطي للكوزينة ديراكت ياخاه يا الكشرودة هههههههه يتخلعو منك راكي في دار الناس ما تنسايش وخاصة مرت سلفك راهي اكثر وحدا تعسك يا بهلولة وراح تترصدلك كل اخطائك الوغ لازم من النهار الاول تدخلي بهيبتك التشناف والحطة والكبرياء .ديري في بالك كيما ولفتيلهم النهار_الاول راح تقعدي ادا دخلتي كي البهلولة ودرتي روحك تحشمي ياااا يما ياكلوك باطاطا هههههههه وادا دخلتي بالهيبة والتشناف راح يديروك فوق راسهم.
المهم نوصيك كي تدخلي للكوزينة لازم تديري في بالك بلي كاين غسيل مواعن تسياق وطياب المهم اتقاسمي الشغل مع مرت سلفك وادا كانو السلفات في الدار ما تحوسيش عليهم خلي الشغل بينك وبين مرت سلفك او ادا كانو بزاف يعني زوج ولا ثلاث نسا سلاف مليح هاكدا كل وحدا دير حاجة نوصيك اطونسيو اطونسيو تلعبيها شاطرة وتروحي تنعتي روحك وتقولي انا ندير وندير علابالنا شاطرة يا قردوشتي هههههههه بصح خلي شطارتك لدارك وحدك ماشي مع الغاشي
الوووغ ننتقلو لحاجة اخرى ما تكونيش سمية وعقروبة ادا كان عندك غير عجوزتك وشيخك وسلفتك برك لازم تديري روحك في دارك اخدمي بالنية الصافية لي قدرتي عليها اخدميها .هادي ادا كانت العايلة صغيرة .بصح ادا كان عندك خواتات راجلك يعني سلافاتك .هنا اتقاسمي الشغل معاهم نورمال وماشي تخلصي الكوزينة خلاص تروحي عاوني في التسياق وفي مسيح الغبرة والحوايج الاخرى خاصة ادا كانت العجوزة وحدها مسكينة كبيرة ما تقدرش لهاد الحوايج وهنا رايحة تربحيها وترجع تحبك .ااااه مادام جبدنا الهدرة على العجوزة باش تكسروها يا العدرات لازم تحتارموها وتاخدو رايها وتشاوريها في كلشي خاصة ادا جيتي تطيبي قوليلها وشاوريها كل مرة واش تطيبي ماشي تروحي ديري واش في راسك شاوري عرب الدار يحبو لي يشاورهم خاصة ادا كانت عندك سلفتك كبيرة في الدار راهي تكون العجوزة الثانية في البيت .مالا شاوريها هيا تاني
نروحو لحاجة اخرى اللبسة يا الحنونة نوصيك ونوصيك ونزيد مع سلافاتك جامي تقعدي معاهم بلبسة مفضوحة او تديري فيهم زكارة وتلبسي القصير والبيجامات البونتاكور والحوايج الاخرى خليهم غير في شمبرتك خاصة ادا عندك سلافاتك في الدار قيس زواج راح تقيسيهم وتستفزيهم مساكن حرام عليك .جامي تطيحيلهم المورال يشوفوك انتي متزوجة بخوهم وهوما كبار ومازالو في الدار جامي تروحي تديري اي حاجة تقيسهم كاين بزاف عرايس يخرجو قلوب سلافاتهم ويعايروهم ويقولولهم بايرات .لالا توجور خلي الاحترام بيناتكم
كاينة حاجة. جامي تداسري عرب الدار وداخسيهم عليك جامي تجمعي معاهم بزاف ولا تضحكي وتهدري ونهار كامل وانتي معاهم وتحكيلهم اسرارك اطونسيو جامي تخليهم يدخسو عليك. هاهي عيني يا طفلة كوني شاطرة.
الوووغ يا فنفوناتي نروحو نحكيو في حاجة اخرى مع راجلك كوني مرا ونص ماعليش راكم تعرفو بعضاكم مليح ومداصرين بعضاكم بصح جامي تخليه يشوف منك الحاجة التافهة ولي ماشي مليحة راكم تسقسيو كيفاش ؟؟
الوووغ نقوللكم جامي تخليه يتمسخر معاك بكلمات تطيح من قيمتك كيما مثلا كاين بعض الرجال يقولو بقرة حمارة حشاكم وحيوانة وهاكدا وهاكدا غير يقولها مرة انهريه وشنفي وزعفي وقوليلو ماتزيدش تقولي هاكدا دايمن خلي حواجز بيناتكم لانو ادا راح الاحترام راح كلشي جامي تنقصي من روحك يا طفلة وترضاي بحاجة رخيسة وقليلة دايمن كوني فوق فوق قوليلو انا موالفة لاكلاس موالفة الحاجة الغالية ههههههه ماعليش انتي كنتي تلبسي بيجامة تاع سبعين الف قوليلو انا نلبس غير حاجة فرونسي وحاجة ترك حتى انتوما يا لمخطوبات ولي راكم في علاقة غير واضحة ادللو وبومبيو شويا على صحابكم والله يا طفلة كيما تولفي راجلك تلقايه ههههههه وزيد الراجل يحب المراة لي عندها كبرياء وماشي طالقة روحها يحبها تلبس مليح ويزوخ بيها وتاني يكون عندها ذوق اطورو يا الرب العالي هههههههه يا كشرودات ادللو وكي تهدري مع راجلك اهدري بصوت هادئ ورزين وماشي غير تطيشي كلمة منا وكلمة منا وترفسيها قوش دروات هههههه كوني لالاة النسا وبيني لراجلك بلي راكي حبة مفقودة اوك حبوبة
و متنسايش تابعي مواضيعنا رح نزيدكم بزاف نصائح حنونة
حبكم
Siso
ليست هناك تعليقات:
إرسال تعليق