معاناة فتاة قروية
كرونيك هايلة تحكي على أحلام و صغرها و حياتها لي عاشتها قاسية تبعوها معايا ان شاء الله تعجبكم حبيباتي
أنا أحلام عمري 17 سنة نسكن في أرضنا في دشرة بعيدة على كل العالم عمري ما شفت بلاصة غيرها حكايتي أطول من أني نحكيها بالكلمات نحكيلكم من الي بدات كي كان عمري 14سنة نسرح في غنمات بابا الشايب الكبير الأعمى و المشلول .صغيرة فرحانة بصغري لابسة روب وردية راشية مقطعة و فولارة على راسي لابسة شلاكة ساعة نلبسها و ساعة نحيها و نجري بالحفا كي نغلب نتكا تحت شجرة الزيتون الصغيرة الي زرعتها أنا و ماما ربي يرحمها ..راقدة نتفرج مع الغيوم و ندعي ربي تصب المطر باه ندي غنماتي و نروح للدار خاتر غلبت .
حتى نسمع في الحشيش يخروش و الأعواد تتكسر باين واحد جاي نهز العصا الي كنت نسرح بيها و نقول شكون نلقاهم ثلاث رجال الشر يبان من عينيهم جريت هربت حكموني عيطت على بابا سكتوني نحولي قشي و خلوني قاومتهم بالي نقدر غلبوني مابقالي غير دمعت عيوني و دعواتي لربي يسلكوني.
تداولو عليا خطفولي أغلى حاجة ليا أصواتهم كي الذيوبة مازالت في وذنيا .
حرقوني بالجمر في قلبي سرقولي شرفي و خلاو غير لاتراس تاع نيبانهم و كفوفهم و دمي الي سايل بين رجليا .
يا ربي مالي غيرك.... طفولتي و برائتي راحت و أحلامي معاها واش راح نخبي و على شكون نخبي على والدي الأعمى الي عايش في الظلام ولا الناس الي مهما قالت ما تتلام هذا عار الدنيا و بلاء طاح عليا .
فاتت ليام و راح والدي الونس تاعي في الدنيا بعد ثلاث سنين عذاب خلاني وحدانية في الدنيا.... غير هذوك الحجار الي لا يسترو لا يخبو عار ...موحال نسميها دار خاتر مابقالي فيها والو .
والدي المسكين كان كل يوم يتمنى الموت مرتين كان حاسس أنو زاد عليا وصاني يا بنتي كي نموت أقصدي البلاد الكبيرة لا ماشبعتي تباتي في الدفاء .
و درت بوصية والدي لبست القشابية و عطيت الريح لرجليا نمشي و ماعلابالي وين نروح بين الجبال و في وسط الحجر حتى وصلت للطريق الكبيرة حبسلي كاميو فيه راجل كبير قالي وين تروح يا وليدي سكتت و مارديتش قالي أركب ركبت بين المعيز و النعجات نخمم واش مخبيتلي هاذ الحياة .
وصلنا للبلاد الكبيرة كانت الضواو في كل مكان و الهدرة و الحس ماعندي ما نقوللكم . حبسنا قالي الراجل أهبط خلاصو صواردك هبطت نشوف منا و من هيه الظلمة طاحت ما عرفت وين نروح .
نقص الطرق نلقى مرأة مفرشة الكارطون و ترضع في ولدها الصغير رحت و قعدت قدامها هيا بدات تعيط يا خامج يا رخيس واش بغيت نحيت الكبوسة تاع القشابية و قلتلها راني طفلة خليني نبات بحذاك هاذ الليلة تعيشي .
سكتت شوي و من بعد قاتلي قدمي هنا و ارقدي
أنا رجعت الكبوسة و من الغلبة جازت عليا عيني رقدت حتى نسمع المرأة تعيط لابوليس لابوليس يا الضابط والله راهي طفلة و حكمني من قشي البوليسي و نحالي الكبوسة و قالي أنتم واش ديرو هنا ماتعرفوش أنو خطر عليكم هزونا في الطوموبيل و المرأة قعدت تقول الحمد لله يارب غير كي فرجتيها علينا .
ما فهمت والو دخلونا لبلاصة كبيرة مليانة عباد النساء من جيهة و الرجال من جيهة وحد أخرى .
دخلوني لجيهة النساء و قالولي شوفي وين ترقدي حتى يطلع النهار نشوف في مرأة كبيرة تبان لباس بيها تشورلي من بعيد أرواحي رحت قعدت قدامها عطاتني بساط و زاورة و قاتلي ماتخافيش .
طلع النهار جات طبيبة شافتني دارولي ليزاناليو و سقساوني واش إسمي قلتلهم أحلام و وين تسكني و امك و باباك و .... عطاولي قش و قالولي دوشي .
دوشت و لبست و خرجت رحت قدام هذيك العجوز هي بدات تمشطلي شعري الطوييييل و تقلي الله يبارك يا بنيتي وين كان هذا الزين مخبي والهم واش يعمل في البنآدم .. أحكيلي يا بنتي واش جابك أنا مهدرت حتى كلمة حتى مع واحد .
فاتت سمانة بديت نوالف و هذيك العجوز كانت حنينة عليا حكيتلها قصة اليتم و الهم الي عشتها جبدتني عندها و قاتلي ربي الي يفرجها سقستني: تحبي تخدمي ؟؟
قلتلها هيه بصح شكون يقبل يخدم وحدة نيفو رابعة متوسط قاتلي: أصبري .... هزت البورتابل تهدر مع واحد تقلو معليش تخدمها يا أستاذ عمر أي حاجة فرحت أنا .
كوبات و قاتلي وجدي روحك غدوة روحلي العنوان هذا و سقسي على المدير و قوليلو بعثتني أنسة رقية .
أنا حكمت الورقة خبيتها في صدري و نستنى غدوة نروح .
طلع النهار وصلت للعنوان نلقاها متوسطة كبيرة أكبر من الي قريت فيها ب 10 مرات .
دخلت سقسيت على المدير وصلوني ليه هدرت معاه كان راجل كبير في وجهو الوقار . إستقبلني بكل تواضع و قالي مانقدر نخدمك والو يا بنتي غير فام دوميناج تقبلي ؟؟
قتلو معليش نخدم أي حاجة .
قالي راهي بعثاتك أكبر أستاذة خدمت في هاذ المؤسسة أنا قعدت غير حايرة واش وصل أستاذة محترمة لبلاصة كيما هذيك ؟
قالي المدير تقدري تبداي الخدمة من اليوم و غدوة جيبيلي الوثائق هذم و إنشاء الله نسويلك الوضعية .
عيط لمراقب يخدم ثم قالو أعطيها طابلية و الأدوات العشية تبدأ الخدمة .
رحت و انا نتفرج على جمال هذيك المتوسطة تمنيت كون جيت نقرأ حتى أنا الأولاد في عمري مازالو يقراو وأنا راح نبدأ العمل الحمد لله على كل حال .
المراقب إسمو علي كان الخبث واضح من تصرفاتو قالي تحبي نبقى معاك حتى تكملي الخدمة أزين ؟؟
أنا خزت فيه بإشمئزاز و قتلو تحب نمسح بيك الدنيا و يلقاوك مقتول و مرمي في ليتوالات أبقى .... هههههه حسيت الطفلة الي ماتت فيا كي كان عمري 14عاودت رجعت للحياة بصح راح تتعلم تحمي نفسها .
خدمت و رجعت للمركز شكرت أنسة رقية على الخدمة و عاد هذا هو روتين حياتي.
فاتو الأيام و انا نتفرج على الأولاد و البنات و هم يقراو و قلبي يوجع فيا تمنيت نكمل قرايتي . نهار كنت قاعدة في الساحة جات مجموعة من التلاميذ يقراو رابعة متوسط يحلو في موضوع و انا نسترجع في واش قريت حتى لقيت روحي نحل معاهم في السيجي و لقيت الحل و قلتلهم عليه... دارو كامل حايرين فيا!! "نسيت ما قلتلكمش أني كنت من الممتازين " .تلمو عليا و بداو يقولولي نعتيلنا و هذا هو الحال كل يوم .
كنت نحكي لأنسة رقية حتى نصحتني نسجل مع الأحرار و هذاك هو الحال سجلت و عقبت و نجحت و كملت للباك و انا نخدم و نقرأ بالمراسلة و كانت أنسة رقية تدعم فيا و تشجع فيا و تقلي هذي هي فرصتك باه تخرجي من هاذ الهم .
قريب الباك يا ربي راني خايفة ماننجحش كل عام الشعب العلمية هي أقل نسبة نجاح .
الحقيقة حتى مدير المؤسسة كان يشجع فيا و كان واثق أني راح ننجح بمعدل مليح كان يدعمني بكل حاجة يقدر عليها الحمد لله الدنيا مازال فيها الخير .
ثلاث أيام و نعڨب الباك راني خايفة قلبي يوجع فيا انسة رقية حتى هي مرضت معايا من الخلعة خرجت رحت عملت ريفيزيون جينيرال عند واحد الأستاذة تاع رياضيات و رجعت للمركز فرحانة أني متمكنة من كل الأسئلة .
انا داخلة و الإسعاف خارجة هذي ما تكون غير الحاجة خدوجة توحشت السيروم قالتلهم أدوني للسبيطار ههههههه دخلت نحوس على أنيسة رقية مالقيتهاش نسقسي الناس كامل ساكتة ماحبوش يقولولي .
أنا : أهدرو قولو وين راهي ؟؟جاوبوني وعلاه تحڨرو فيا !!!؟؟؟
راهي طاحت و هزوها للسبيطار .
أنا : و للمرة الرابعة نحس بمرارة أنك تفقد عبد ولا حاجة عزيزة عليك نجري كي المهبولة في الطريق و نقول ماتموتيش ربي يعيشك ماتخلينيش راني كرهت من المعيشة وحدي نبكي و نجري و ما عرفتش وين نروح قعدت على حاشية الطريق سرحانة و غير الدموع تهبط من عينيا حتى نلقى واحد يقلي مادموزال راكي بخير كشما بيك حاجة... أنا وقفت و مشيت نشوف وانا طريق نوصل بيها للسبيطار ماعرفتش حتى وين راني زدت قعدت في نص الطريق و نبكي زاد هدر معايا هذاك الجان واش بيك يا أختي وين رايحة خزرت معاه و قتلو وصلني للسبيطار.
قالي: ساهلة أمشي معايا .
قتلو :أمشي أنت قدامي .
مشينا حتى وصلنا كي شفت البلاكة قتلو تقدر تروح ذرك .
هو : قالي باين فيك مقلقة على كاش واحد معليش مرسي كي وصلتيني .
أنا دخلت و نحوس في ليرجونس حتى لقيتها .
جريت ديراكت حضنتها و نبوسلها في يديها و راسها و نقلها الحمد لله مازلتي حية الحمد لله مارحتيش خليتيني .
و الطبيب يسقسي فيها شكون هذي ؟؟
نطقت أنسة رقية هذي بنتي الي ماجابتهاش كرشي .
و دارت عندي قاتلي و هذا صلاح ولد ولدي . هو هبط راسو و باين حشم و راح
أنا قعدت حايرة مع العلم عمرها ما حكتلي واش قصتها .
كي جيت راح نخرجها رحت نجيب لوردونونس لقيت صلاح قالي نانا وين راهي قتلو تسقسي فيا ؟؟هذا وين تفكرتي عندك ناناك ؟؟ ياخي صحانية وجه .
و مشيت و خليتو وصلنا للمركز الليلة هذيك سقسيتها أنسة رقية واش قصتك من فضلك أنا راه حكمني الفضول بدات تحكيلي :
أنا يا بنتي عندي طفل وحيد مارزقنيش ربي غيرو جريت عليه لبست قريت أنا و باباه بعثناه للخارج جاب شهادتو من فرانسا و جاب معاها مرأة و من ثم تبدلت حياتنا 180° كانت مغربية لا علاقة مع التربية و الأدب راجلي تصدم و غضب عليه كانت تبان وحدة من الشارع "حاشاك يا بنتي أنتي الله غالب الدنيا الي ظلماتك " هذا كامل عادي القلب و ما يريد بعد ما مات راجلي أنا كانت عندي لاروترات تاعي .و العقرب مرت ولدي خيراتو بناتنا قرر يحطني هنا باه مانصرفش بزاف و يعلم أولادو أحسن تعليم ربي يهديه و هي لكان تسمع بواحد من أولادها جاء يشوفني تعذبو . ماكفاهاش هذا كل زاد ولد كرشي رفع عليا قضية حجر" أني موش قادرة عقليا" و نحالي الشهرية ههههه الدنيا !! القراية الي قريتهالو .
غاضتني أنسة رقية و قلت الزمااان أ .......أنا كون غير قعدت يما و بابا نخدم عليهم للنهار الي نموت .
عديت الباك و راني نستنى في النتيجة و ما تصدقوش المفاجأة نجحت بتقدير ممتاز 17،30 و كرموني في الولاية الي ساكنة فيها أول فرحة في حياتي و عملت حفلة في المركز فرحتلي الناس الكل و خاصة أنسة رقية و عادو يعيطولي الطبيبة سجلت و بالتأكيد عملت الطب .
و تبدلت حياتي و بدأ فصل جديد منها في عالم جديد و أنا مازلت في المتوسطة مع أنو توقيت القراية عندنا مافيهش الفراغ لكن المدير مساعفني
اليوم الأول شريت قش جديد و قصيت شعري الي عمري ما جاء فيه المقص و رحت معولة على ربي و على روحي .
طالعة نجري في دروج لافاك حتى ندخل في طفل كان هابط قريب جيت على راسي لمزية حكمني .
هو: أختي لاباس ماشفتكش .
أنا: ماعليش . .. حتى نلقاه يقلي أنتي موش الي وصلتك واحد النهار للسبيطار واش راهي يماك ؟؟
باه تفكرت موش الوجه بصح الصوت .
قتلو راها بخير نجي نهز راسي نشوف نلقى عبد....لا سامحوني ملاك بقلاوة يهدر معايا نشوف غير مع هذاك الطول و الجسم المفتول و اللحية و الشوافر و البشرة الصافية و العينين النوازات وحدة فيكم تجي تحكمني راح ندوخ أنا في الدنيا ولا مت و دخلت للجنة .
هو: أختي راكي مليحة .
انا : كشما كاين واحد يشوه هاذ الشي و ما يبقاش مليح .
هو المهم مافهم والو هههههه
مد يدو و قالي أنا عبد الجليل سنة الرابعة طب أنتي راكي جديدة ؟؟
انا: هيه عامي الأول و إسمي أحلام .
قالي هيا إمشي قدامي نعتلك لافاك على زهري
أنا تبسمت و مشيت معاه .
معلاباليش علاه فرحانة و ندرڨ في سناني ما حبوش يدرڨو و بنات لافاك كل يشوفو معايا .
من بعد تفكرت.... أنا هذاك النهار ماقتلكش جيت نشوف يما شكون قالك موش بابا؟؟؟
هو حشم و قالي كانت عندي خدمة دخلت نطل على صحبي لقيتك معاها .
أنا :أمم ...
راح النهار لا قراية لا والو حكمت شومبر أنديفيديال و خدمتها و نظفتها خاتر منا على 7سنين راح تكون داري .
فات عليا شهر من القراية للخدمة ماعنديش صحابات ما نحبش نخالط حتى وحدة و كانو يقولو عليا متكبرة غير عبد الجليل كنت نشوفو كل يوم و كنت مانجاوبوش على حتى سؤال يتعلق بيا قررت نروح للمركز نطل على أنسة رقية والله عملت فيها العيب شهر ماشفتهاش .
دخلت نسقسي قالولي جاء وليد ولدها داها تسكن عندهم و راهي خلتلي العنوان .
فرحتلها من كل قلبي و رحت نطل عليها .
فيلا كبيرة نطبطب حلوعليا الباب يستقبلني ولد ولدها صلاح أنا الحقيقة كرهتو من أول ماشفتو شافتني فرحت بيا و قعدنا نتوانسو و قاتلي أنها مرت ولدها (أم صلاح ) ماتت بعد معاناة مع السرطان لمدة 3سنين وكي جاء صلاح قاللها قبلت ترجع معاه .
الحمد لله ربي يسڨم أحوال جميع الناس و بديت أنا نحكي على الجامعة و فرحانة حتى يدخل صلاح في الخط و نعرف الدكاترة كامل و نعرف و نعرف ...... و كشما يخصك أني هنا و انا قريب نقلو بلع فمك الله غالب ما حملتوش .....يتبع
Siso
كملي
ردحذفالتكملة
ردحذف