العناية بالمنطقة الحساسة

يالله نبداو باسم الله شويا تفاعل لبنات

موضوع اليوم هو لي راكم تستناو فيه " العناية بالمنطقة الحساسة" .

نبداو بأول حاجة تبعو معايا حبوباتي: 

قبل ازالة الشعر ننصحك تمسحي المنطقة بمطهر ( كحول) 

استعملي براون اذا عندك للمنطقة العليا و بالنسبة للاسفل جيلات 3 لام تاع رجال ( ماتقولوليش لاسيغ بسك كامل علابالنا بلي مشي مليحة و زيد الرسول صلى الله عليه و سلم وصانا بنتف الابط وحلق العانة) 

لما تكملو ادهنو المنطقة ب biafine هكا تتفاداو تماما مشكل الحبوب.

نروحو للمرحلة الثانية و لي هي العناية بها .

كي تدخلي المرحاض عزاك الله دخلي معاك مغلي الخزامة( ماء مغلي مع الخزامة) و غسلي بيه راه يداوي الافرازات والاتهابات و يخليلك رائحة تهبل .

جيبي صاك دو توالات و لا تروسا حطي فيها المكونات التالية :

منشفة صغيرة لازم تنشفي بعد كل غسل لمنع الاسمرار وزيدي

خليط ( زيت الورد ماركة شركة الكابتن + عصير ليمونة خلطيهم حتى تتحصلي على خليط يشبه للفينيقرات) و دهني بواسطة قطنة و راح تشوفي لما داومي عليها كيفاش تبياض و زيد تبقى فيك رائحة روعة .

زيدي في تروسا هذيك طالك كي تدهني دايما ديريه باش تبقاي ناشفة. 

هذي التروسة لازم كل ماتدخلي للتوالات عزاك الله دخليها معاك ولفي روحك ماتعزجيش حتى كي تتزوجي تكوني موالفة و ماتتقاليش عليها.

نصيحة اخرى اشري ملابس داخلية 100٪ قطن و غيريها مرتين في اليوم. مرة على مرة خلي فكرونتك تستهوا هههههه اسمحولي على هذي الكلمة جداتي كانت تقولنا هاك كي كنا صغار الله يرحمها .

اه نسيت حاجة كاين غاسول صافورال تغسلي بيه 3 مرات في السبوع .

وكاين معطر ديريه في ملابسك الداخلية femfresh .هذو زوج هايلين لوكان طبقو كامل هذو الصوالح تولو كي لمشمومات ريحتكم غير ورد و تحسو روحكم غاية و ترتاحو نفسيا صدقوني عن تجربة تولي عندك ثقة نفس ماشاءالله.

اتهللو في رواحكم نتمنى مانكونش طولت عليكم تفكروني بالادعية الصالحة 

#ريم